ԵՐԵՎԱՆ, 28 հոկտեմբերի – Sputnik. ՌԴ նախագահի մամուլի քարտուղար Դմիտրի Պեսկովը հայտնել է, որ Վլադիմիր Պուտինի և Թուրքիայի նախագահ Թայիփ Էրդողանի հեռախոսազրույցի ժամանակ բանակցային գործընթացում և Ղարաբաղյան հակամարտության կարգավորման գործում Թուրքիայի մասնակցության թեման չի քննարկվել։
Պուտինը երեկ է խոսել Էրդողանի հետ և քննարկել հակամարտության գոտում ընթացող իրադարձությունների զարգացումը։
«Ոչ, դա օրակարգում չի եղել։ Ես պարզապես ուզում եմ վերադառնալ իմ երեկվա պարզաբանումներին, որևէ նոր տարր այստեղ չկա», – ասել է Պեսկովը` պատասխանելով հարցին, թե արդյոք Պուտինի և Էրդողանի զրույցի ընթացքում քննարկվե՞լ է Թուրքիայի մասնակցությունը բանակցային գործընթացին և Ղարաբաղյան հակամարտության կարգավորմանը։
Միևնույն ժամանակ Թուրքիայի նախագահ Թայիփ Էրդողանը, ելույթ ունենալով «Արդարություն և զարգացում» իշխող կուսակցության խորհրդարանական խմբակցության առաջ, ասել է, որ Վլադիմիր Պուտինի հետ հեռախոսային բանակցությունների ընթացքում առաջարկել է ՌԴ առաջնորդին միասին մասնակցել ղարաբաղյան ճգնաժամի կարգավորմանը։
«Մենք Պուտինի հետ քննարկել ենք ղարաբաղյան իրադարձությունները։ Ասել ենք`եկեք Կովկաս, լուծեք այդ խնդիրը։ Եթե ուզում եք, միասին լուծենք։ Դուք խոսեք ձեր գործընկերների հետ, մենք` մեր։ Թող մեր արտգործնախարարները և մյուսները ևս զրուցեն։ Կարևոր է հասկանալ, թե արդյոք մենք կլուծենք այդ հարցը, թե ոչ։ Եկեք վերջ դնենք սրան։ Մենք անկեղծ ենք։ Եվ հավատում եմ, որ դուք ևս անկեղծ եք», – նշել է Էրդողանը։
Հիշեցնենք` սեպտեմբերի 27-ի վաղ առավոտյան Ադրբեջանը, Թուրքիայի աջակցությամբ, լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 28-ի ժամը 13։00-ի դրությամբ` հակառակորդի կրակոցների հետևանքով Արցախում զոհվել են 1068 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 223 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 618 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
