ԵՐԵՎԱՆ, 26 հոկտեմբերի - Sputnik. Հայկական կողմն ամեն ինչ արել է, որպեսզի հրադադարը պահպանվի։ Facebook-ի ուղիղ եթերում հայտարարեց ՀՀ վարչապետ Նիկոլ Փաշինյանը։
«Հերթական անգամ չստացվեց հրադադարը պահպանել։ Չեմ կարող ասել, թե ինչպիսին կլինի ԵԱՀԿ Մինսկի խմբի համանախագահող երկրների արձագանքը դրան, բայց պետք է իմանաք, որ հայկական կողմն ամեն ինչ արել է, որպեսզի հրադադարը պահպանվի»,–ասաց նա։
Փաշինյանի խոսքով` պաշտպանության բանակն առավոտից զսպված է եղել, բայց օրվա երկրորդ կեսին կարող ենք արձանագրել, որ երրորդ անգամ ևս հրադադարը չի պահպանվել։
«Մենք դեռ չգիտենք, թե ԱՄՆ նախագահն ինչպես կարձագանքի հրադադարի ձախողմանը, բայց ասեմ, որ կեսգիշերն անց հեռախոսազրույց եմ ունեցել, ԱՄՆ պետքարտուղար Մայք Պոմպեոյի հետ և իրեն ուղիղ ասել եմ, քանի որ սա իրենց համար առաջին հրադադարն է, իսկ մեզ համար՝ երրորդը, ես կարող եմ մոտավորապես կանխատեսել, թե ինչ է տեղի ունենալու վաղը։ Ասել եմ, որ վաղն ամենայն հավանականությամբ հրադադարը չի պահպանվի և ամենայն հավանականությամբ Ադրբեջանը կասի, որ հայկական կողմն է հրադադարը խախտել»,–ասաց նա։
ՊՆ-ն կարևորում է հրադադարի ռեժիմի պահպանման հստակ պարամետրերի շուտափույթ ներդրումը
Փաշինյանի խոսքով` ԱՄՆ պետքարտուղարին ուղղված ամենակարևոր հարցն այն է եղել, որ եթե հրադադարը չպահպանվի, ինչպե՞ս են պարզելու թե ով է դրա մեղավորը և ի՞նչ հետևանքներ է ունենալու հրադադարի խախտումը` այն խախտող կողմի համար։
«Ես այժմ կոռեկտ չեմ համարում ասել, թե ինչ է պատասխանել ԱՄՆ պետքարտուղարը, ես հույս ունեմ, որ այս հարցերի պատասխանները կստանամ այսօր։ Կարելի է համարել, որ ԱՄՆ–ում աշխատանքային օրը սկսված է։ ԱՄՆ–ի պաշտոնական ներկայացուցիչը, հույս ունեմ, կպատասխանի, թե արդյոք իրենք պարզեցին, թե որ կողմի գործողությունների արդյունքում է խախտվել հրադադարը և ինչ հետևանքներ է դա ունենալու հրադադարը խախտած կողմի համար»,–ասաց վարչապետը։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ էր պարունակում։
Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակում էր հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը, համանախագահող երկիր Ֆրասիայի միջնորդությամբ, երկրորդ պայմանավորվածությունն են ձեռք բերել. որոշվել էր հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:
Ղարաբաղյան հակամարտության գոտում հումանիտար հրադադարի մասին երրորդ պայմանավորվածությունը ԵԱՀԿ ՄԽ 3–րդ համանախագահ երկրի առաջնորդը հայտարարեց։ Հոկտեմբերի 25–ին Դոնալդ Թրամփը հայտարարեց հոկտեմբերի 26-ին՝ առավոտյան ժամը 8:00-ից Լեռնային Ղարաբաղում նոր հումանիտար հրադադար հաստատելու մասին։
Ադրբեջանը այսօր էլ է խախտում հրադադարի վերաբերյալ պայմանավորվածությունները։
