ԵՐԵՎԱՆ, 25 հոկտեմբերի - Sputnik. Խաղաղության ու ազատության ձգտումներում մեզ աջակից է Աստված։ Այսօր Գարեգին Երկրորդ ամենայն հայոց կաթողիկոսը հայրապետական ուղերձ է հղել աշխարհասփյուռ հայությանը։ Պատերազմը մեզ պարտադրվեց, բայց այս կռվում հաղթանակն է երաշխիքն ու գրավականը Արցախի Հանրապետության անվտանգության և անսասանության։ Վեհափառն ընդգծել է՝ վերջին տասնամյակների պատմությունն ու Ադրբեջանի ներկա կեցվածքը ցույց են տալիս՝ Արցախը չի կարող որևէ կարգավիճակով լինել Ադրբեջանի կազմում։
Հետևաբար մեր գոյության առջև ծառացած սպառնալիքը մեզ այլ ընտրություն չի թողել, քան կենաց ու մահու պայքարում պաշտպանելու Արցախի ժողովրդի ազատ ու անկախ կյանքի իրավունքն ու վերահաստատել խաղաղություն։ Հատկապես, երբ աշխարհը դեռ հապաղում է դատապարտել թշնամու ոճրագործություններն ու վայրագությունները։
«Քաջերի սերունդները քաջերն են։ Այսօր քաջերի մեր նոր սերունդ է հերոսանում նույն ոգով և նախնյաց լուսավառ օրինակով, հանձնառու նվիրաբերել նաև անգին կյանքը մեր ժողովրդին ու հայրենիքին»,- ուղերձում նշել է կաթողիկոսը։ Նա ընդգծել է՝ նույն քաջությունն ունեն այն ծնողները, որոնք մեր ժողովրդին նման հերոսներ են պարգևել։
«Խոնարհում և երկնառաք օրհնություն մեր զինվորների և աշխարհազորայինների ընտանիքներին՝ թանկագին մայրերին ու հայրերին»։
Վեհափառը հայրապետը գնահատանքի խոսքեր է ուղղել նաև Հայաստանի ազգային փոքրամասնություններին, որոնց զավակներն այսօր մեր ժողովրդի կողքին են մարտնչում հանուն ազատության։
«Քաջաբար ելեք հայրենիքի ու ազգի պաշտպանության նվիրական պայքարին, կանգնեք սահմանագծում մարտնչող մեր քաջորդիների կողքին, որպեսզի պարտության մատնենք նենգ թշնամուն, խորտակենք նրա չար մտադրություններն ու ավելի հզորացնենք հայրենի մեր երկիրը, մեր պետականությունը»,- ասել է Վեհափառ հայրապետն ու ավելացրել, որ այսօր ամենակարևոր պահն է համազգային միասնականության համար։
Վեհափառը վստահություն է հայտնել՝ մեր նորագույն պատմության հերթական հաղթանակն ենք կերտելու։ Ինչպես մենք ենք ոգեշնչվում մեր նախնիների քաջագործություններով, այնպես էլ մեր սերունդներն են հպարտությամբ խոսելու այս ժամանակների մասին։
Ամենայն Հայոց կաթողիկոսի ուղերձը խաղաղության աղոթքով եզրափակվեց, վերջին բառերն արտասանելիս խորհրդանշանակորեն ղողանջեցին հայոց եկեղեցու զանգերը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 25-ի ժամը 14։30-ի դրությամբ` հակառակորդի կրակոցների հետևանքով Արցախում զոհվել են 974 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6614 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 24 ինքնաթիռ, 16 ուղղաթիռ, 217 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 600 տանկ և ՀՄՄ:
Հայը, «սիրիացին» ու բելառուսը. «հին գելերը» մեկնել են առաջնագիծ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը
