ԵՐԵՎԱՆ, 24 հոկտեմբերի – Sputnik. Ադրբեջանի հրթիռակոծության հետևանքով վնասված Սուրբ Ղազանչեցոց եկեղեցում պսակադրության արարողություն է կայացել։ Տեղեկությունը հայտնում է ԱԺ «Իմ քայլը » խմբակցության պատգամավոր Գայանե Աբրահամյանը։
«Հարսանիք Շուշիում։ Ես չգիտեմ երբևէ բառեր կգտնեմ պատմելու այն, ինչ զգում եմ հիմա...»,– Facebook–ի իր էջում գրել է նա։
Լուսանկարներում երևում է, որ փեսան զինվորական հագուստով է, իսկ հարսը` տարազով։
Գրառմանը հաջորդել են մեկնաբանությունները։ «Խաղաղ երկնքի տակ երջանիկ ու առողջ կյանք նորապսակներին։ Շնորհավոր։ Երջանիկ լինեն ու խաղաղ երկրում զավակներին ծնեն, մեծացնեն։ Ջա՜ն, ֆանտաստիկ ազգ ենք։ Անհավատալի անկոտրում ազգ ենք։ Որտեղ հարսանիք ու ծնունդ, այնտեղ ՝ կյանք ու հարատևություն։ Գրկում եմ ու տասը զավակ մաղթում»,– գրել են օգտատերերը։
Լուսանկարիչ էդգար Բարսեղյանն էլ Facebook–ում գրել է. «Ասք այն մասին, թե ինչպես Հովհաննեսն ու Մարիամը իրականացրին բառիս բուն իմաստով «Հարսանիք» լեռներում օպերացիան։ Բարով գնաս, Հովիկ ջան, հաղթանակած վերադառնաս։ Մարիամ ջան, քեզ էլ համբերություն։ Նոր հերոսներ ենք սպասում ձեր, մեր բոլորիս նոր ընտանիքից»։
Շուշիի Ղազանչեցոց եկեղեցին իր գոյության ընթացքում շատ բան է տեսել, ադրբեջանցիները ժամանակին նույնիսկ որպես պահեստ են օգտագործել այն։ Առաջին անգամ չէ, որ թշնամին ավերում է եկեղեցին, իսկ արցախցիները հետո կառուցում են այն։ Շուշիի այս խորհրդանիշն արտացոլում է հայ ժողովրդի տոկունությունն ու հաստատակամությունը, սեփական հողի հանդեպ սերն ու հավատարմությունը քրիստոնեական ավանդույթներին:
Արցախի թեմի առաջնորդն այցելել է վիրավոր զինվորներին, աղոթել Սուրբ Ղազանչեցոցում
Սեպտեմբերի 27-ին Ադրբեջանի սանձազերծած նոր պատերազմի օրերին եկեղեցին կրկին գնդակոծության ենթարկվեց, ինչը լուրջ ավերածությունների հանգեցրեց։ Մայր տաճարում այդ պահին կանայք ու երեխաներ կային, որոնք թաքնվել էին այնտեղ՝ հույս ունենալով, որ հակառակորդը թիրախ չի դարձնի սրբավայրը։ Բայց նրանք սխալվեցին։ Բարեբախտաբար զոհեր չեղան։
Հայկական պատասխան բարբարոսությանը. բելգիահայ երաժիշտը նվագում է Ղազանչեցոց կիսավեր վանքում
Սակայն եկեղեցու հերթական գնդակոծությունից հետո հայտնի դարձավ, որ ծանր վիրավորվել է ռուս ռազմական մեկնաբան Յուրի Կոտենոկը։ Բացի նրանից, վնասվածքներ էին ստացել նաև «Ռուսաստանի սպաներ» կայքի հատուկ թղթակից Լևոն Արզանովը և Հրանտ Բադալյանը, որն ուղեկցում էր լրագրողներին:
