ԵՐԵՎԱՆ, 23 հոկտեմբերի – Sputnik. Արցախի ՄԻՊ Արտակ Բեգլարյանն անդրադարձել է ադրբեջանական կողմի` հայ ռազմագերիների ու զինծառայողների դիակների հանդեպ անմարդկային վերաբերմունքի դեպքեր ներկայացնող տեսանյութեր ու լուսանկարներ հրապարակելուն:
Նա նշել է, որ անխոս, դրանք դաժանագույն պատերազմական հանցագործություններ են, և պետք է խստագույնս դատապարտվեն ու պատժվեն դրանց հեղինակներն ու խրախուսողները:
«Մարդու իրավունքների պաշտպանի փաստահավաք առաքելության շրջանակներում շարունակաբար փաստագրում ենք այդպիսի դեպքերը և պատրաստում համապատասխան փակ զեկույցներ, ինչպես նաև տվյալները փոխանցում ենք Կարմիր խաչի միջազգային կոմիտեի գրասենյակին, որպեսզի միջոցներ ձեռք առնեն ռազմագերիների ու դիակների վերադարձման ուղղությամբ»,–գրել է Բեգլարյանը և մի քանի խնդրանք հղել հայրենակիցներին:
1. Չտարածել այդպիսի նյութերը հայկական շրջանակներում, քանի որ ադրբեջանական կողմի նպատակը հենց հայկական հասարակության տրամադրությունների վրա բացասականորեն ազդելն է այդ հոգեբանական դիվերսիաների միջոցով
2. Չխոսել այդպիսի դեպքերի մասին հատկապես հայրենիքի պաշտպանության գործում ընդգրկված անձանց հետ
3. Զգուշանալ նաև տեսածներին հավատալու հարցում, քանի որ երբեմն կիրառվում են կեղծ նյութեր հատկապես սիրիական պատերազմից։
Բեգլարյանը նշել է, որ պետք չէ մոռանալ, որ տեղեկատվական-հոգեբանական անվտանգությունը հայրենիքի անվտանգության գլխավոր բաղադրատարրերից մեկն է, և որքան քիչ տեղեկություններ ադրբեջանական տեղեկատվական դաշտից մտնեն մեր դաշտ, այնքան ավելի լավ:
Նշենք, որ վերջին օրերին համացանցում, ադրբեջանական աղբյուրներում ակտիվորեն տեսանյութեր են տարածվում, որտեղ ներկայացվում են Ադրբեջանի տարածքում գտնվող հայ գերիները։
«Սիրտս պայթում է». ինչ նամակ է գրել գերեվարված Ազնիվը
Ներկա պահին պաշտոնապես հաստատված տեղեկությունների ու համացանցում տարածված տեսանյութերի համաձայն, սեպտեմբերի 27-ից սանձազերծված Արցախյան պատերազմի ընթացքում Ադրբեջանի կողմից գերեվարվել է ընդհանուր առմամբ 14 մարդ, այդ թվում՝ քաղաքացիական անձինք։
