ԵՐԵՎԱՆ, 22 հոկտեմբերի – Sputnik. Երևան քաղաքի ընդհանուր իրավասության դատարանը` դատավոր Մնացական Մարտիրոսյանի նախագահությամբ, որոշեց ազատ արձակել «Բարգավաճ Հայաստան» կուսակցության առաջնորդ Գագիկ Ծառուկյանին։
Պաշտպանների ներկայացրած միջնորդությունը բավարարվեց։ Ծառուկյանն ազատ կարձակվի 100 մլն դրամ գրավի դիմաց։
Նրա պաշտպանական թիմի անդամ Սամվել Դիլբանդյանը լրագրողների հետ զրույցում հայտնեց, որ առաջին ատյանի դատարան դիմելու հիմքը քրեական դատավարության օրենսդրությամբ նախատեսված նոր հանգամանքների ի հայտ գալն է։
«Նոր հանգամանքը մեր երկրի ռազմական դրությունն է, ու դատարանը, գնահատելով մեր միջնորդության մեջ բերված բոլոր իրավական և փաստական հանգամանքները, կայացրեց արդարացի որոշում»,- ասաց նա։
Փաստաբանի խոսքով՝ իրավական տեսանկյունից ևս հիմնավորվել է, որ Սահմանադրության 27-րդ, ինչպես նաև եվրոպական կոնվենցիայի 5-րդ հոդվածի համաձայն՝ ազատությունից զրկված յուրաքանչյուր անձի պետք է հնարավորություն տրվի ներկայացնելու համապատասխան միջնորդություն՝ ազատ արձակվելու թույլատրելի երաշխիքներ ներկայացնելու համար։
Հարցին՝ կհասցնե՞ն արդյոք այսօր վճարել գրավը, Դիլբանդյանը նշեց, որ պիտի փորձեն, ամեն ինչ անեն։
Պաշտպանները շտապում են վճարել գրավը, ներկայացնել անհրաժեշտ փաստաթղթերը, որպեսզի Գագիկ Ծառուկյանը կարողանա լքել ԱԱԾ մեկուսարանը։
Հիշեցնենք` նա մեղադրվում է ՀՀ քրեական օրենսգրքի 154.2-րդ հոդվածի 2-րդ մասով՝ ընտրողին անձամբ կամ միջնորդի միջոցով ընտրողի կամ այլ անձի համար կաշառք տալու համար։ Ծառուկյանին կալանավորել էին սեպտեմբերի 25-ին:
Գագիկ Ծառուկյանը տուժող է ճանաչվել բռնաբարությանը վերաբերող քրեական գործով
