ԵՐԵՎԱՆ, 22 հոկտեմբերի – Sputnik. Ամերիկյան «Viasat» ընկերությունը վստահեցրել է, որ դադարեցնում է թուրքական «Բայրաքթար» ԱԹՍ–ների համար կապի միջոցների մատակարարումը։ Ընկերության գրասենյակի առաջ բողոքի ակցիա իրականացնող հայ համայնքի անդամներին այդ մասին հայտնեց ամերիկահայ ակտիվիստ Քրիստինե Հալաջյանը։
Նրա խոսքով` իրենք զրուցել են «Viasat» ընկերության PR մենեջեր Քեն Փեթերմանի հետ, և նա է տեղեկացրել այդ մասին։
«Այդ մարդն անկեղծորեն լաց էր լինում։ Արցունքներն աչքերին ներողություն էր խնդրում և ասում, որ իրենք ընդամենը պաշտպանողական միջոցներ են վաճառում ու չեն իմացել, որ դրանք այսօր օգտագործվում են ահաբեկիչների կողմից»,– ասաց Քրիստինե Հալաջյանը։
Ընկերության ներկայացուցիչը նաև իր ցավակցությունն ու ներողությունն է հայտնել հայ ժողովրդին` խոստանալով, որ դիմելու են ԱՄՆ պաշտպանության նախարարությանն ու բացատրություն են պահանջելու, թե ինչպես է օգտագործում ՆԱՏՕ–ի անդամ Թուրքիան իրենց արտադրած տեխնոլոգիաները։
Հալաջյանը նաև հայտնեց, որ Քեն Փեթերմանը ընկերության անունից խոստացել է փոխհատուցում տրամադրել Հայաստանին ու վստահեցրել, որ ինքն անձամբ իր անձնական միջոցներից ևս հանգանակություն է անելու հօգուտ Հայաստանի։
Ակցիայի մասնակիցներն ուղիղ եթերում շնորհակալություն հայտնեցին Քեն Փեթերմանին իրենց խնդրանքին ընդառաջելու ու աջակցելու համար։
Նշենք, որ մինչ այս հայտարարությունը ամերիկահայ համայնքը շուրջ 2 օր անընդմեջ խաղաղ բողոքի ակցիա էր իրականացնում ամերիկյան «Viasat» ընկերության գրասենյակի դիմաց։ Քրիստինե Հալաջյանը մի քանի ժամ պառկել էր գրասենյակի մուտքի մոտ` փակելով ոչ միայն շենքի մուտքը, այլև փողոցի անցուդարձը։
Դրանից հետո ընկերության ներկայացուցիչը հանդիպման է հրավիրել ակցիայի մասնակիցներին։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 21-ի ժամը 16:40-ի դրությամբ` հակառակորդի կրակոցների հետևանքով զոհվել են 834 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6459 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 23 ինքնաթիռ, 16 ուղղաթիռ, 202 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 580 տանկ և ՀՄՄ:
Այս տղերքն Արցախի հյուսիսային դիրքերն են պաշտպանում. հանգստի հազվադեպ րոպեները
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը
