ԵՐԵՎԱՆ, 21 հոկտեմբերի – Sputnik. ՀՀ շրջակա միջավայրի նախարարությունը դիմել է միջազգային կառույցներին` տեղեկացնելով թուրք-ադրբեջանական ագրեսիայի հետևանքով արցախյան պատերազմի շփման գծի ողջ երկայնքով հումանիտար և բնապահպանական աղետի առկա վտանգի մասին։
«Ռազմադաշտում դիակների հետ կապված իրավիճակն արդեն դուրս է գալիս վերահսկողությունից․ տեսագրող սարքերը տեսագրել են, թե ինչպես են վայրի կենդանիներն ուտում դիակները։ Նման հումանիտար աղետը կարող է հանգեցնել սոսկալի մարդկային և բնապահպանական խնդիրների՝ այդ թվում նաև կենդանիների միջոցով տարբեր վտանգավոր վարակիչ հիվանդությունների տարածմանը։ Այս հետևանքները չեն սահմանափակվի միայն Արցախի, Հայաստանի և Ադրբեջանի տարածքներով, այլ վտանգ կներկայացնեն ամբողջ տարածաշրջանի համար»,– ասվում է նախարարության տարածած հաղորդագրության մեջ։
Նշվում է նաև, որ վերոնշյալ տարածքում առկա են Կարմիր գրքում գրանցված տեսակներ։ Տարածաշրջանը բնակավայր է հազվագյուտ և անհետացող կովկասյան ընձառյուծի, գորշ արջի, բեզոարյան այծի, սև և գրիֆոնի անգղերի ու այլ կենդանիների համար։
Հոկտեմբերի 18-ին Արցախի Հանրապետության նախագահի խորհրդական Դավիթ Բաբայանը հայտարարել էր, որ ռազմաճակատի որոշ հատվածներում հակառակորդի անթիվ դիերի պատճառով կրիտիկական իրավիճակ է ստեղծվել, քանի որ մեծ է համաճարակների առաջացման վտանգը։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվել են, որ հոկտեմբերի 10-ին` ժամը 12։00-ից սկսած, հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակում էր հրետակոծել Արցախը։
Լավրովն առանձին հանդիպումներ է ունեցել Հայաստանի ու Ադրբեջանի արտգործնախարարների հետ
Հումանիտար զինադադարի երկրորդ համաձայնությունը կողմերի միջև ձեռք էր բերվել հոկտեմբերի 17-ին` ֆրանսիական կողմի միջնորդությամբ։ Այն պետք է ուժի մեջ մտներ հոկտեմբերի 18-ին, ժամը 00:00-ից։ Հրադադարի ժամկետից րոպեներ անց հակառակորդը հարձակման էր անցել ձեռնտու դիրքեր գրավելու նպատակով։
Ավելի ուշ Ադրբեջանի նախագահ Իլհամ Ալիևը հայտարարեց, որ Ադրբեջանը պատրաստ է միակողմանի հակական կողմին զինծառայողների դիակները, ըստ էության` հրաժարվելով սեփական դիակներից։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 21-ի ժամը 10:00-ի դրությամբ` հակառակորդի կրակոցների հետևանքով զոհվել են 772 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6459 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 23 ինքնաթիռ, 16 ուղղաթիռ, 202 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 580 տանկ և ՀՄՄ:
Այս տղերքն Արցախի հյուսիսային դիրքերն են պաշտպանում. հանգստի հազվադեպ րոպեները
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը
