ԵՐԵՎԱՆ, 21 հոկտեմբերի – Sputnik. Ռուս բժիշկներն այսօր ընդհանուր առմամբ սովորել են պայքարել կորոնավիրուսային նոր վարակի դեմ, Ռուսաստանի արդյունաբերողների և ձեռնարկատերերի միության համագումարի ժամանակ հայտարարել է ՌԴ նախագահ Վլադիմիր Պուտինը։
«Թեպետ ցավոք, նոր վարակակիրների թիվն ավելացել է, բայց մեր բժիշկներն ընդհանուր առմամբ սովորել են պայքարել կորոնավիրուսի դեմ», – ասել է Պուտինը։
Հիշեցնենք, որ օգոստոսին Ռուսաստանն առաջինն աշխարհում գրանցեց COVID-19–ի դեմ պատվաստանյութ, որը ստեղծել են Գամալեայի կենտրոնն ու Ուղիղ ներդրումների ռուսական հիմնադրամը։ «Սպուտնիկ V» անվանումը ստացած պատվաստանյութի առաջին խմբաքանակն արդեն իսկ շրջանառության մեջ է դրվել և Ռուսաստանի մարզեր է մատակարարվում։
Ռուսաստանում զուգահեռաբար փորձարկվում է ևս 4 պատվաստանյութ, որոնք ստեղծել են «Վեկտոր» կենտրոնը, Չումակովի անվան ինստիտուտը, չինական Sinopharm և անգլո–շվեդական AstraZeneca ընկերությունները։
Կորոնավիրուսի դեմ ի՞նչ պատվաստանյութ կհասնի Հայաստանին. նախարարությունը քայլեր է անում
Սեպտեմբերի վերջին «Վեկտոր» կենտրոննում ավարտվեցին SARS-CoV-2–ի դեմ պատվաստանյութի կլինիկական փորձարկումները։ «ԷպիՎակԿորոնա» անվանումով «Վեկտորի» պատվաստանյութը կորոնավիրուսի դեմ ռուսական երկրորդ պատվաստանյութը դարձավ։ Այն արտադրվել է SARS-CoV-2–ի վիրուսի սպիտակուցների քիմիականորեն սինթեզված պեպտիդների անտիգենների և այլ բաղադրիչների հիման վրա։ Պատվաստանյութը կենդանի թուլացած վիրուսներ կամ կորոնավիրուսի գենետիկ նյութ չի պարունակում։ Պուտինը կոչ է արել ընդլայնել կորոնավիրուսի դեմ ռուսական երկու պատվաստանյութերի արտադրությունը և նախևառաջ ապահովել տեղական շուկան։
