ԵՐԵՎԱՆ, 20 հոկտեմբերի - Sputnik. Գեղարքունիքի մարզի Նոր Սեմյոնովկա գյուղի ամենատարեց զույգերից մեկը` 75-ամյա Մարուս տատն ու Գառնիկ պապը, մորթել ու վաճառել են իրենց կովն և գումարն ուղղել Զինծառայողների ապահովագրության հիմնադրամին։ Այս մասին տեղեկացնում է Նոր Սեմյոնովկայի Facebook-յան էջը։
«Արևշատություն ձեզ, Թարթարյանց զույգ, դուք արժանի եք մեծագույն հարգանքի։ Ու թող ձեր օրինակը վարակիչ լինի բոլորի համար», – գրված է հաղորդագրությունում։
Հիշեցնենք, որ «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքն ընդունվել էր ապրիլյան քառօրյա պատերազմից հետո`2016թ–ի դեկտեմբերի 14-ին, ուժի մեջ մտել 2017թ–ի հունվարի 1-ից։
ՀՀ աշխատող քաղաքացիներից յուրաքանչյուրն այս օրենքով պարտավորվում է իր ամսական աշխատավարձից ամեն ամիս 1000-ական դրամ վճարել զինծառայողների աջակցության հիմնադրամին։
Նախաձեռնությունը հանրության շրջանում ստացել է «1000 դրամների օրենք» անունը։
«Զինծառայողների ապահովագրության» հիմնադրամի պաշտոնական կայքի տվյալներով հիմնադրամի ստեղծման պահից առ այսօր հավաքագրվել է 29 519 596 149 դրամ։ Դրանից 27 250 731 040 դրամը պարտադիր վճարումներով, 2 268 865 109` նվիրատվությամբ։ Այս գումարից առ այսօր օգտագործվել է 2 405 165 088 դրամը։
