Ժենգյալով հացի հերթ Հյուսիսային պողոտայում. ստեփանակերտցի կանայք որոշել են օգնել բանակին

ԵՐԵՎԱՆ, 19 հոկտեմբերի – Sputnik. Երևանի կենտրոնում, Հյուսիսային պողոտայի սկզբնամասում հավաքված հոծ բազմությունը համբերատար սպասում է իր հերթին։ Հերթն արցախյան հայտնի ուտեստի` ժենգյալով հացի համար է։

Անմիջապես փողոցում կազմակերպված «բացօթյա արտադրամասի» գլխավոր գործող անձը ստեփանակերտցի տիկին Արմինեն է` Արմինե Աբրահամյանը։

«Որ արդեն ընկել ենք այս կրակը, պիտի դուրս գանք։ Տղաներն առաջարկեցին, ես էլ համաձայնեցի։ Հա՛մ երեխաներիս կպահեմ, հա՛մ մեր զինվորներին կօգնենք»,– Sputnik Արմենիայի թղթակցի հետ զրույցում ասաց Արմինե Աբրահամյանը։

Հայաստան տեղափոխված արցախցիներին ու Արցախը պաշտպանող բանակին օգնելու նախաձեռնության հեղինակները հայաստանցի մի քանի երիտասարդներ են, ովքեր գերադասեցին ստվերում մնալ։ Միայն ասացին, որ գումարի մի մասը մնալու է տիկին Արմինեին ու նրա հետ աշխատող մյուս արցախցի կանանց, մյուս մասը փոխանցվելու է բանակին։

Տիկին Արմինեն ժենգյալով հաց թխելու մեծ փորձ ունի։ 15 տարի այդ աշխատանքով է զբաղվել Ստեփանակերտի շուկայում, բայց պատերազմի պատճառով երեխաների հետ ստիպված է եղել թողնել ամեն ինչ ու ժամանակավորապես տեղափոխվել Հայաստան։

Բայցևայնպես, չի ափսոսում ո՛չ աշխատանքը, ո՛չ տունը, ո՛չ հայրենի քաղաքը։ Ափսոսում է միայն Արցախի գոյության համար զոհված տղաներին։

«Քաղաքը 10 տարում նորից կկառուցվի, բայց տղաները հետ չեն գա»,– ասում է նա` չկտրվելով աշխատանքից։

Իսկ այդ ընթացքում Հյուսիսային պողոտայում հերթը շարունակում է ավելանալ։ Ժենգյալով հացն այսօր Արցախի յուրօրինակ խորհրդանիշ է դարձել, հատկապես, եթե դրանով կարելի է նաև օգնել Արցախին։

Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 18-ի ժամը 19:00-ի դրությամբ` հակառակորդի կրակոցների հետևանքով զոհվել են 729 զինծառայողներ և 36 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6259 զոհ ունի և բազմաթիվ վիրավորներ։ 

Ըստ վերջին տվյալների՝ Ադրբեջանի զինված ուժերը կորցրել են 22 ինքնաթիռ, 16 ուղղաթիռ, 195 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 566 տանկ և ՀՄՄ:

Ղազանչեցոցը 2 անգամ վերականգնած ճարտարապետը վստահեցնում է` եկեղեցին ավերված երկար չի մնա 

Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ 

«Թող իմանան` մենք ողջ ենք, լավ ենք». առաջնագծի տղաների` ժպիտ պարգևող լուսանկարները