ԵՐԵՎԱՆ, 18 հոկտեմբերի – Saputnik. Այսօր` հոկտեմբերի 18–ին, ՄԱԿ–ի Գլխավոր քարտուղարի մամուլի քարտուղար Ստեֆան Դյուժարիկը ներկայացրել է Հայաստանի և Ադրբեջանի հարաբերությունների մասին ՄԱԿ–ի գլխավոր քարտուղար Անտոնիո Գուտերեշի հայտարարությունը։
Վերջինը դատապարտել է հակամարտությունից տուժած բնակավայրերի վրա բոլոր հարձակումները։
Հոկտեմբերի 16-ին Գյանջայում տեղի ունեցած իրադարձությունների մասին նա հայտնել է. «Հարվածի հետևանքով քաղաքացիական անձանց, այդ թվում՝ երեխաների ողբերգական մահը բացարձակապես անընդունելի է»։
Գուտերեշ անընդունելի է որակել նաև չտարբերակված հարձակումները բնակավայրերի վրա, այդ թվում ՝ Ստեփանակերտում և Լեռնային Ղարաբաղի հակամարտության անմիջական գոտում։
«Գլխավոր քարտուղարը խորապես ցավում է, որ կողմերը մշտապես անտեսում են միջազգային հանրության բազմաթիվ կոչերը ՝ անհապաղ դադարեցնելու ռազմական գործողությունները»,– փոխանցել է մամուլի քարտուղարը։
Նա նաև նշել է, որ Հայաստանի ու Ադրբեջանի արտաքին գործերի նախարարների հետ վերջին հեռախոսազրույցներում Գուտերեշն ընդգծել է, որ երկու կողմերն էլ պարտավոր են միջազգային մարդասիրական իրավունքին համապատասխան մշտապես հոգ տանել ռազմական գործողությունների ժամանակ քաղաքացիական բնակչության նկատմամբ ու պաշտպանել քաղաքացիական ենթակառուցվածքները։
Գլխավոր քարտուղարը հույս է հայտնել, որ կողմերն ամբողջությամբ կկատարեն հոկտեմբերի 18-ի հումանիտար զինադադարի որոշումն ու անհապաղ կվերսկսեն առարկայական բանակցությունները ԵԱՀԿ Մինսկի խմբի համանախագահների հովանու ներքո:
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։ Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակում էր հրետակոծել Արցախը։
Էրդողանը Հայաստանին զինելու մեղադրանք է ուղղել Մինսկի խմբի համանախագահ երկրներին
Երեկ` հոկտեմբերի 17-ին, ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն այսօր առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք կան զոհեր ու վիրավորներ: ՀՀ ՊՆ մամուլի խոսնակ Շուշան Ստեփանյանն էլ հայտնեց, որ հակառակորդը հարձակում է սկսել ձեռնտու դիրքեր գրավելու նպատակով։
