ԵՐԵՎԱՆ, 17 հոկտեմբերի - Sputnik. ՀՀ ԱԺ «Իմ քայլը» խմբակցության պատգամավոր, նախկին հաղորդավար Լուսինե Բադալյանը մեկնում է արցախյան առաջնագիծ։ Տեղեկությունը նա անձամբ է հայտնել Facebook-ի իր էջում։
«Մենք գնացինք, մենք չունենք զիջելու ՀԱՅՐԵՆԻՔ։ Լավ մնացեք, թիկունքն ամուր կպահեք։ Սիրում եմ բոլորիդ»,- գրել է պատգամավորը։
Նա նաև կոչ է արել միանալ հայրենիքի պաշտպանությանն ու դիմել զինկոմիսարիատ։ Պատգամավորը մեջբերել է վարչապետ Նիկոլ Փաշինյանի հայտնի խոսքերը.
«Հայաստանի ապագան կախված է մեկ մարդուց և այդ մեկ մարդը Դու ես»։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 16-ի ժամը 12:00-ի դրությամբ` հակառակորդի կրակոցների հետևանքով զոհվել են 633 զինծառայողներ և 34 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5959 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 21 ինքնաթիռ, 16 ուղղաթիռ, 181 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 552 տանկ և ՀՄՄ:
Ղազանչեցոցը 2 անգամ վերականգնած ճարտարապետը վստահեցնում է` եկեղեցին ավերված երկար չի մնա
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
«Գրադի» կրակի տակ. ինչպես են տարեց տղամարդիկ ապրում Մարտունու ապաստարաններից մեկում
