ԵՐԵՎԱՆ, 15 հոկտեմբերի - Sputnik. The Washington Post–ն այսօր հրապարակած ծավալուն հոդվածում անդրադարձել է թուրք–ադրբեջանական կողմում կռվող ահաբեկիչների թեմային։
Ամերիկյան պարբերականը կոնկրետ փաստ է հրապարակել այն մասին, որ Թուրքիայի ու Սիրիայի սահմանին գտնվող մաքսակետում ԼՂ–ում սպանված 52 ահաբեկիչների դիակներ են հանձնվել նրանց հարազատներին։
«Ընտանիքները հավաքվել էին սառնարանային բեռնատարի շուրջ սիրիա-թուրքական սահմանային կետի մոտ ու սպասում էին, թե երբ վարորդները կբաժանեն իրենց սարսափելի բեռը` տնից շուրջ 600 մղոն հեռու ընթացող պատերազմում զոհված 52 սիրիացի դիակները»,– գրում է The Washington Post–ը:
Պարբերականը, վկայակոչելով զոհերի հարազատների մեկնաբանությունները, նշում է, որ մահացածները վարձկաններ էին, որոնք Սիրիայի տարածքում հավաքագրվել էին Թուրքիայի կողմից` Ադրբեջանի ԶՈւ–ի կազմում Լեռնային Ղարաբաղի դեմ կռվելու համար։
Շոյգուին մտահոգել է վարձկան գրոհայիններին Ղարաբաղ տեղափոխելու տեղեկությունը
Հոդվածագիրը զրուցել է սիրիացի 38-ամյա մարտիկ Մահմուդ Նաջարի զարմիկի հետ, որը հայտնել է, որ Մահմուդի մարմինը սառնարանային բեռնախցիկում նշված է եղել «12» համարով։
Նա նաև պատմել է, որ նրան թուրքական աջակցությունը վայելող գրոհայինները հավաքագրել են ամսական 2000 ԱՄՆ դոլար աշխատավարձ խոստանալով։
«Փողը միակ պատճառն է, - ասել է զոհված ահաբեկչի զարմիկը,–Ո՞վ էր ուզում գնալ Ադրբեջան: Ո՞վ գիտեր նույնիսկ Ադրբեջանի տեղը»:
Նա նաև պատմել է, որ Թուրքիայից Ադրբեջան տեղափոխվելու առաջին օրը նրանց բաց կանաչ զինվորական համազգեստ են հագցրել ու հաջորդ օրն ուղարկել ռազմաճակատ:
«Սիրիացի վարձկանները հիմնականում մենակ էին անծանոթ վայրում, շրջապատված էին իրենց համար անհասկանալի լեզուներով, պատմությամբ և խնդիրներով: Նրանց ուղեկցում էին երեք ադրբեջանցիներ»,– պատմել է թերթի զրուցակիցը։
Խոսելով հորեղբոր մահվան հանգամանքների մասին` նա նշել է, որ 9 ժամ շարունակ նրանք փորձել են ինչ–որ լեռնային բարձունք գրավել։ Բայց տեղ հասնելուն պես սպանվել են դիպուկահարի գնդակից ու ամբողջ գիշեր մնացել այնտեղ, որտեղ ընկել են։
Հիշեցնենք` արցախա–ադրբեջանական հակամարտության գոտում ծավալված ռազմական գործողությունների ֆոնին տեղեկություններ տարածվեցին, որ Սիրիայից և Լիբիայից վարձկան գրոհայիններ են տեղափոխվում Ադրբեջան` Արցախի պաշտպանության բանակի դեմ կռվելու համար: Վարձկաններին հակամարտության գոտի է ուղարկում Թուրքիան։
«Վիրավորներին թողնում են մահանան, որ չվճարեն». վարձկանների խոսակցություն է հրապարակվել
Այս տեղեկությունը հաստատել են ոչ միայն Հայաստանի և Արցախի իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչները: Ընդ որում` Ֆրանսիան և Ռուսաստանը ամենաբարձր մակարդակով են մտահոգություն հայտնել այդ թեմայով։
Սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 14-ի ժամը 21:00-ի դրությամբ` հակառակորդի կրակոցների հետևանքով զոհվել են 555 զինծառայողներ և 32 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:
«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը
