ԵՐԵՎԱՆ, 14 հոկտեմբերի – Sputnik. Ռուսաստանցի զինվորականները ստուգում են Հայաստանում տեղակայված օբյեկտներից մեկի ոչնչացման մասին չորեքշաբթի օրը տարածված տեղեկությունը, հայտարարել է ՌԴ նախագահի մամուլի քարտուղար Դմիտրի Պեսկովը լրագրողների հետ զրույցում, փոխանցում է ՌԻԱ Նովոստին։
Նրա խոսքով՝ ռուսական ռազմական գերատեսչությունները ստուգում են այդ տեղեկությունը, նրանք մշտական կապի մեջ են Հայաստանի և Ադրբեջանի իրենց գործընկերների հետ:
«Դուք գիտեք, որ նախարար Շոյգուն հեռախոսային կապ է ունեցել երկու կողմերի գործընկերների հետ։ Այդ տեղեկությունը ստուգվում և վերլուծվում է»,-ասել է Պեսկովը։
Ճշգրտող հարցին, թե արդյոք այդ տեղեկության հաստատման դեպքում ուժի մեջ կմտնեն ՀԱՊԿ մեխանիզմները, նա առաջարկեց սպասել ստուգման արդյունքներին։Մեկնաբանելով Մոսկվայի, Բաքվի, Անկարայի և Երևանի մասնակցությամբ Ղարաբաղի հարցով քառակողմ բանակցություններ անցկացնելու առաջարկը՝ Պեսկովը հիշեցրեց, որ հոկտեմբերի 10-ին Մոսկվայում երեք արտգործնախարարների հանդիպման ընթացքում բոլոր երեք կողմերն էլ հաստատել են բանակցային ձևաչափի անփոփոխության սկզբունքը:
Պեսկովը մեկնաբանել է Ղարաբաղում սիրիացի ահաբեկիչների մասին Ասադի հայտարարությունը
Ավելի վաղ Ադրբեջանի նախագահ Իլհամ Ալիևը հայտարարել էր, որ առանց Թուրքիայի մասնակցության Լեռնային Ղարաբաղի հակամարտությունը չի հաջողվի լուծել: Նա ընդգծել էր, որ Թուրքիան պետք է միանա բանակցություններին, որոնց մասնակցում են Ռուսաստանը, Ադրբեջանն ու Հայաստանը:
Պատասխանելով այն հարցին, թե ինչպես է իրականացվում ղարաբաղյան հակամարտության գոտում հրադադարի մասին պայմանավորվածությունը, Պուտինի մամուլի քարտուղարը հայտարարել է, որ Մոսկվան մտահոգված է նրանով, որ պայմանավորվածությունները չեն կատարվում:
«Դժվար թե կողմերը, որոնք Մոսկվայում բազմաթիվ ժամեր բանակցություններ են անցկացրել, կարող են բավարարվել նրանով, թե ինչպես է կատարվում (կրակի դադարեցման ռեժիմի մասին պայմանավորվածությունը)։ Այստեղ, իհարկե, միայն անհանգստություն կարելի է հայտնել»,-ասել է Պեսկովը լրագրողներին։
Հիշեցնենք, որ ավելի վաղ Հայաստանի Հանրապետության պաշտպանության նախարարությունը տեղեկացրել էր, որ հոկտեմբերի 14-ին ադրբեջանական զինուժը թիրախավորել է ՀՀ տարածքում, Քարվաճառի հետ սահմանակից գոտում մարտական հերթապահություն իրականացնող մարտական տեխնիկան՝ ընդամենը ենթադրությունների հիման վրա, թե, իբր, այդ տեխնիկան պատրաստ է եղել հարվածել Ադրբեջանի խաղաղ բնակավայրերին։
ՀՀ պաշտպանության նախարարությունը, վերահաստատելով, որ մինչև այս պահը ՀՀ տարածքից որևէ հրթիռ, արկ կամ գնդակ չի արձակվել Ադրբեջանի ուղղությամբ, միևնույն ժամանակ հայտարարել է, որ այսուհետ ՀՀ ԶՈւ–ն իրեն իրավունք է վերապահում նույն տրամաբանությամբ թիրախավորել Ադրբեջանի տարածքում գտնվող ցանկացած ռազմական օբյեկտ կամ ռազմական տեղաշարժ։
