ԵՐԵՎԱՆ, 11 հոկտեմբերի - Sputnik. Ռուսաստանցի ռազմական վերլուծաբան Յուրի Կոտենոկը, որը Շուշիում Ադրբեջանի ԶՈւ-ի կողմից Ղազանչեցոց եկեղեցու հրետակոծության ժամանակ վնասվածքներ է ստացել, առաջին անգամ հարցազրույց է տվել Ռոսիա 24 հեռուստաալիքին։
Ավելի վաղ հայտնի էր դարձել, որ Կոտենոկը դուրս է եկել կոմայից ու թեև դժվարությամբ, բայց կարող է խոսել։ Sputnik Արմենիայի ղեկավարը ռուսական համայնքից ՀՀ ԱԺ պատգամավոր Ալեքսեյ Սանդիկովի հետ այցելել էր գործընկերոջը։
Վերհիշելով այդ օրը՝ Կոտենոկն ասել է, որ պայթյունը նրանից մի քանի մետր հեռավորության վրա է եղել։
«Ես գիտակցությունս չէի կորցրել։ Փլատակների տակ էի։ Շատ դժվար էր շնչել, քանի որ նախորդ հարվածներից հետո այնտեղ փոշին շատ էր։ Սկսեցի ինչ-որ ձայներ հանել ու ինձ միանգամից հանեցին», - ասել է Կոտենոկը հեռուստաալիքին։
Կոտենոկի խոսքով՝ վնասվածք ստանալուց հետո նրան եկեղեցու քահանան է տեղափոխել․
«Նա աղոթում էր, որ չմահանամ։ Շատ շնորհակալ եմ նրան», - ասել է լրագրողը։
Հիշեցնենք` ռուս լրագրողները վիրավորվել էին հոկտեմբերի 8-ին։ Ադրբեջանական ԶՈւ կողմից Շուշիի Սուրբ Ամենափրկիչ Ղազանչեցոց եկեղեցու առաջին հրթիռակոծությունից հետո լրագրողներն այնտեղ էին գնացել հետևանքները նկարահանելու համար։ Այդ ժամանակ Ադրբեջանը երկրորդ անգամ էր հրթիռակոծել եկեղեցին, ինչի հետևանքով վիրավորվել էին լրագրողներ Յուրի Կոտենոկն ու Լևոն Արզանովը, նաև նրանց ուղեկցողը` Հրանտ Բալադյանը։
Վերջին երկուսը թեթև վնասվածքներ էին ստացել, իսկ Յուրի Կոտենոկը` ծանր։ Նա բեկորային վնասվածքներ էր ստացել որովայնի, կրծքավանդակի և ստորին վերջույթների շրջանում։ Արզանովը և Բալադյանը հոկտեմբերի 9-ին կառավարական ինքնաթիռով տեղափոխվել են Ռուսաստան։
Ռուս լրագրողին Ստեփանակերտից շտապօգնության մեքենայով տեղափոխում են Երևան
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 11-ի ժամը 11։00-ի դրությամբ` հակառակորդի կրակոցների հետևանքով զոհվել են ավելի քան 400 զինծառայողներ և 20 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4719 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 166 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 510 տանկ և ՀՄՄ:
Ինչին պետք է ընտելանանք, եթե Ադրբեջանի հետ պատերազմը երկարի
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Հրադադար, բայց ոչ խաղաղություն. ի՞նչ խնդիր պետք է լուծի բանակը արցախյան պատերազմից հետո
