Մշակութային մի շարք կենտրոններ որոշել են կազմակերպել Արցախից ժամանակավորապես Երևան եկած երեխաների ժամանցը։
Մասնավորապես, Ալեքսանդր Սպենդարյանի տուն–թանգարանը Facebook սոցցանցի իր էջում լուսանկարներ է հրապարակել` տեղեկացնելով, որ մի խումբ արցախցիներ են այցելել իրենց։
«Այսօր հյուրընկալել էինք արցախցի արվեստասեր փոքրիկներին և պատանիներին։ Շրջայցից և կրթական ծրագրերից հետո բոլորս միասին պատրաստեցինք խաղաղության տորթը։ է, տորթերը։ Դրանք երեքն էին, բոլորն էլ անչափ համեղ»,–նշված է գրառման մեջ։
Սունդուկյանի անվան ազգային ակադեմիական թատրոնում նույնպես արցախցիների են հյուրընկալել։ Թատրոնում շրջայցից հետո տեղի դերասանների հետ արցախցիները երգել են կոմպոզիտոր Ռոբերտ Ամիրխանյանի հայտնի երգերից մեկը` «Երազ իմ երկիր հայրենին»։
Արցախցիները երգում են` հույս ու վստահություն աչքերում, որ ամեն ինչ լավ է լինելու։
Իսկ Հովհաննես Թումանյանի անվան տիկնիկային թատրոնի միջանցքը վերածվել է խաղալիքների «կենտրոնի». թատրոնը հումանիտար օգնություն է պատրաստվում ուղարկել, որում մեծ տեղ են զբաղեցնում խաղալիքները։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 244 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 390 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
