ԵՐԵՎԱՆ, 5 հոկտեմբերի – Sputnik. ՀՀ ՊՆ ներկայացուցիչ Արծրուն Հովհաննիսյանը Լրագրողների հետ ճեպազրույցի ժամանակ ասաց, որ այսօրվա ընթացքում հակառակորդը հարձակողական մարտեր է իրականացրել, սակայն հետ է շպրտվել մեծ կորուստներով։
«Մարտերը բավականին թեժ են եղել, սակայն մեր կողմից բավական գրագետ խուսավարում է եղել։ Օրվա ընթացքում Ադրբեջանն իր հաջողությունը փորձել է ամրագրել հայկական ստորաբաժանումներում գտնվելու «ապացույցների» տեսանյութերով, բայց դա հերթական օրինակն էր, որ նրանք ժամանակավոր հաջողությունները փորձում են ներկայացնել մեծ հաղթանակներ»,–ասաց Հովհաննիսյանը։
Նրա խոսքով` Արցախի ՊԲ զինված ուժերը համապատասխան պատասխան են տալիս Ադրբեջանի գործողություններին՝ թիրախավորելով զուտ ռազմական օբյեկտները և զորքերը։
Հովհաննիսյանը նշեց, որ այս պահին չի կարող ամփոփ ներկայացնել հակառակորդի կորուստները, քանի որ մարտերը շարունակվում են։
Անդրադառնալով երեկ ՊԲ–ի տարածած տեսանյութին, որում երևում էր` ինչպես են Ադրբեջանի զինվորները փախչում Մատաղիսից` Հովհաննիսյանը նշեց, որ այսօր էլ նույն բանը հարավային ուղղությամբ էր կատարվում, բայց այս դեպքում տեսանյութ չունեն ցույց տալու։
ՊՆ ներկայացուցիչն իր խոսքն ամփոփեց` ասելով. «Սպասեք լավ լուրերի»։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 5-ի ժ. 13։00-ի դրությամբ` հակառակորդի կրակոցների հետևանքով զոհվել են 223 զինծառայողներ և 18 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3154 զոհ ունի, ավելի քան 5000 վիրավոր։
Ըստ վերջին տվյալների ՝ Ադրբեջանի զինված ուժերը կորցրել են 17 ինքնաթիռ, 14 ուղղաթիռ, 124 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 368 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
