ԵՐԵՎԱՆ, 5 հոկտեմբերի - Sputnik. ՀՀ կրթության, գիտության, մշակույթի և սպորտի նախարար Արայիկ Հարությունյանը շնորհավորական ուղերձ է հղել Ուսուցչի տոնի առթիվ: Նա, բարձր գնահատելով ուսուցիչների դերը, նշել է, որ սահմանին քաջաբար ու աներկյուղ կռվում է նրանց դաստիարակած սերունդը, որ անձնվիրաբար սիրում ու հերոսաբար պաշտպանում է իր Հայրենիքը։
«Այդ սերն ու նվիրումը Դո՛ւք եք նրանց ներարկել, պայքարի անկոտրում ոգին Դո՛ւք եք նրանց մեջ կերտել: Եվ ուրեմն, խոնարհվելով Ձեր վաստակի առաջ՝ փա՛ռք մեր զինվորներին: Երբ թիկունքն ամուր է կրթությամբ ու մշակույթով, ճակատում պայքարը համառ է ու հաղթանակող»,-նշել է նախարարը։
Արայիկ Հարությունյանը շեշտում է, որ ուսուցիչներին բախտ է վիճակվել կրթել այն ժողովրդի զավակներին, որ կրում է դարերի ոգին, գալիքի կամքն ու երազանքը ու հւորդորում է երբեք չդադարել հայ մանուկի առաջ բացել երազելու կախարդական դռները:
Արման Թաթոյանը լուսանկարներ է հրապարակել. Ադրբեջանը հրետակոծել է անգամ դպրոցի շենքը
«Այդ երազանքն է նրան այսօր սահմանին ուժեղ պահում: Ձեր կոչումն անփոխարինելի է, գործը՝ բարդ ու պատասխանատու։ Դուք չերկնչեցիք համավարակի պայմաններում և ջանք չխնայեցիք կրթության շարունակականության համար՝ ինքներդ հընթացս հաստատակամորեն սովորելով և նախաձեռնելով։ Եվ այսօր ձեր գործն անում եք կրկնակի մարտահրավերներին դիմակայելով՝ փոխանցելով ոչ միայն գիտելիք, այլև կամք, համառություն և լավատեսություն, ուստի, թող այն այսօր պսակվի սահմանին կանգնած զինվորի հաղթանակով՝ ի նշանավորումն այս կարևոր տոնի:
...Կեցցե՛ թիկունքը պահող ուսուցիչը, փա՛ռք սահմանին կռվող զինվորին»,-մասնավորապես նշված է շնորհավորական ուղերձում:
