ԵՐԵՎԱՆ, 5 հոկտեմբերի - Sputnik. Այս ռազմական գործողությունները տարբերվում են մյուսներից, քանի որ նախ Ադրբեջանի կիրառած զինատեսակների քանակն է ընդլայնվել, ինչպես նաև խաղի մեջ է ոչ միայն Ադրբեջանը։ Sputnik Արմենիայի հետ զրույցում նման կարծիք հայտնեց Արցախի թեմի առաջնորդ Պարգև արքեպիսկոպոս Մարտիրոսյանը։
«Դաժան պատերազմ է սկսել մեր դեմ Ադրբեջանը։ Սակայն հարցն այն է, որ Ադրբեջանին այս դեպքում սատարում են նաև Թուրքիան, Պակիստանը, որոշ այլ երկրներ էլ զենք են տալիս։ Այս ամենին գումարած՝ Սիրիայից բերված ահաբեկիչներ։ Ահա այս ամենի դեմ մենք մարտ ենք վարում»,–ասաց Պարգև սրբազանը` հավելելով, որ Թուրքիան թիրախավորված է մասնակցում պատերազմին։
Նրա խոսքով` այս իրավիճակում հայությունից մեկ բան է պահանջվում` ազգային միաբանություն, տոկոնություն, աղոթք։ Յուրաքանչյուրը պետք է անի հնարավորը, որպեսզի Արցախում խաղաղություն լինի։
Խոսելով զինծառայողների մասին` սրբազանը նշեց, որ ուղղակի հիանում է մեր զինվորներով։
Պարգև սրբազանը վստահ է` Ադրբեջանի հոգևոր առաջնորդ Ալլահշուքյուր Փաշազադեն, ինչպես և ցանկացած կրոնապետ, դեմ է պատերազմին։ Ոչ մի կրոնապետ չի ուզի, որպեսզի իր հոտի երիտասարդները զոհվեն։ Սակայն, ըստ սրբազանի, ամեն ինչ որոշում է քաղաքական էլիտան. լծակն ու ուժը նրանց ձեռքին է։
Հիշեցնենք, որ սեպտեմբերի 27-ին Պարգև սրբազանը կոչով էր հանդես եկել` ասելով, որ պետք է այս անգամ ևս ապացուցենք, որ մեր միասնականությունն անպարտելի ուժ է։
