ԵՐԵՎԱՆ, 4 հոկտեմբերի - Sputnik. Ադրբեջանը սկսել է հրթիռակոծել նաև Շուշին, որի հետևանքով կան զոհեր և վիրավորներ։ Sputnik Արմենիայի հետ զրույցում ասաց Արցախի Հանրապետության նախագահի մամուլի խոսնակ Վահրամ Պողոսյանը:
«Բացի այդ, դեռ շարունակվում է Ստեփանակերտի հրթիռակոծությունը։ Արցախի մայրաքաղաքում, ցավոք, նույնպես կան զոհեր և վիրավորներ»,–ասաց Պողոսյանը։
Ստեփանակերտում և Շուշիում զոհերը քաղաքացիական անձինք են։ Իսկ թե քանիսի մասին է խոսքը` Պողոսյանն ասաց, որ տեղեկությունը ճշտվում է։
Նշենք, որ արցախա–ադրբեջանական սահմանին ռազմական գործողությունների սկսման պահից սա առաջին դեպքն է, որ հրթիռակոծվում է նաև Շուշի քաղաքը։ Իսկ ինչ վերաբերում է մայրաքաղաք Ստեփանակերտին, ապա այն ադրբեջանական կողմի թիրախում էր հայտնվել դեռ սեպտեմբերի 28-ից։
Այսօր առավոտից Ստեփանակերտի հրթիռակոծումը շարունակվում է։
ՊՆ ներկայացուցիչ Արծրուն Հովհաննիսյանն էլ իր Facebook-ի էջում տեղեկացնում է, որ Շուշիում էլ են թիրախավորվել քաղաքացիական ենթակառուցվածքները։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 3-ի ժ. 22։00-ի դրությամբ` հակառակորդի կրակոցների հետևանքով զոհվել են 202 զինծառայողներ և 8 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 2730 զոհ ունի, 4400 վիրավոր։ Հակառակորդը նաև զինտեխնկայի զգալի կորուստ ունի և շարունակում է գրանցել։
Ըստ վերջին տվյալների ՝ Ադրբեջանի զինված ուժերը կորցրել են 14 ինքնաթիռ, 14 ուղղաթիռ, 123 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 372 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
