ԵՐԵՎԱՆ, 3 հոկտեմբերի – Sputnik. Հայաստանը շարունակում է աշխարհին ներկայացնել Արցախի ու Հայաստանի դեմ Թուրքիայի մղած պատերազմի ապացույցները։ Այս անգամ ՀՀ ՊՆ ներկայացուցիչ Արծրուն Հովհաննիսյանը թուրքական չպայթած արկի լուսանկար է հրապարակել Հայաստանի Գեղարքունիքի մարզի տարածքում։
«Թուրքական արկը` Վարդենիսի Կութ գյուղում»,– գրել է Հովհաննիսյանը։
Հիշեցնենք` ՀՀ և ԱՀ իշխանությունները պարբերաբար հայտարարում են Հայաստանի ու Արցախի դեմ թուրքական ու իսրայելական արտադրության զենքերի ու զինտեխնիկայի կիրառման մասին։ Ադրբեջանից օդ բարձրացած թուրքական F-16 կործանիչները խոցել էին Հայաստանի օդային տարածքում գտնվող Սու 25 ինքնաթիռը։ Օդաչուն հերոսաբար զոհվել էր։
Սեպտեմբերի 29–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։
Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։