ԵՐԵՎԱՆ, 3 հոկտեմբերի - Sputnik. Ադրբեջանին զենքի մատակարարումն անընդունելի է: Այս մասին այսօր կայացած ասուլիսում ասաց Արցախի արտաքին գործերի նախարար Մասիս Մայիլյանը ՝ պատասխանելով Sputnik Արմենիայի հարցին, թե արդյո՞ք ճիշտ է, որ այս ընթացքում որոշ երկրներ Ադրբեջանին զենք են մատակարարում, և ինչպիսին է լինելու մեր պատասխանը:
Մայիլյանը նշեց, որ Հայաստանն արդեն Իսրայելից հետ է կանչել իր դեսպանին` Ադրբեջանին զենք և ռազմական տեխնիկ մատակարարելու համար:
Սոցցանցերում պարբերաբար հայտնվում են տեղեկություններ, որ Ադրբեջանին Իսրայելից և Գերմանիայից ռազմական մատակարարումներ են իրականացվում: Մայիլյանը նշեց, որ այդ տեղեկությունները դեռ պետք է ճշտվեն։
Այնուամենայնիվ, նա վստահ է, որ ապագայում ռազմական մատակարարման հարցերը պետք է քննարկվեն և այդ երկրներից պարզաբանումներ պահանջվեն:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 3-ի ժ. 16։00-ի դրությամբ` հակառակորդի կրակոցների հետևանքով զոհվել են 209 զինծառայողներ և 8 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։ Հակառակորդը նաև զինտեխնկայի զգալի կորուստ ունի և շարունակում է գրանցել։
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
