ԵՐԵՎԱՆ, 3 հոկտեմբերի - Sputnik. ՀՀ առողջապահության նախարարությունը տեղեկացնում է, որ կորոնավիրուսի դեմ պատվաստանյութ ձեռք բերելու նպատակով բանակցություններ է վարում նաև Ռուսաստանի Դաշնության հետ։ Նախարարությունը լուրի մասին հայտնում է ի պատասխան Sputnik Արմենիայի գրավոր հարցման։
Նշենք, որ սեպտեմբերի 22-ին ՀՀ առողջապահության նախարար Արսեն Թորոսյանը հեռախոսազրույց էր ունեցել Սպառողների իրավունքների պաշտպանության և մարդու բարեկեցության ոլորտում վերահսկողության ՌԴ դաշնային ծառայության ղեկավար Աննա Պոպովայի հետ։ Sputnik Արմենիան հետաքրքրվել էր նախարարությունից, թե արդյո՞ք հեռախոսազրույցի ընթացքում քննարկվել է նաև ռուսական «Սպուտնիկ V» պատվաստանյութից գնելու հարցը։
«ՀՀ–ն այս պահին կորոնավիրուսի դեմ անվտանգ և արդյունավետ պատվաստանյութ ձեռք բերելու համար բանակցություններ է վարում ինչպես ՌԴ–ի, այնպես էլ այլ երկրների բոլոր հնարավոր թեկնածու պատվաստանյութ արտադրողների և միջազգային գործընկերների հետ»,–նշված է մեր հարցմանն ի պատասխան։
Նախարարությունից հայտնում են նաև, որ ՌԴ սպառողների իրավունքների պաշտպանության և մարդու բարեկեցության ոլորտում վերահսկողության դաշնային ծառայության հետ մշտապես քննարկվում են առկա խնդիրները` տեղեկատվության փոխանակման նպատակով։
Թորոսյանը Չինաստանի դեսպանի հետ քննարկել է պատվաստանյութերի կիրառման հնարավորությունը
Հիշեցնենք, որ այժմ ամենից առավել շրջանառվում են մի քանի պատվաստանյութերի անուններ` ռուսական «Սպուտնիկ V»–ն և ամերիկյան «Մոռեդնան», անգլիական «ԱստրաԶենեկան», ինչպես նաև մի քանի չինական պատվաստանյութեր։
Sputnik Արմենիայի հետ զրույցում ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը հայտնել էր` Հայաստանն ունի չափանիշներ, որոնցով կառաջնորդվի պատվաստանյութ ձեռք բերելու հարցում։ Կարևոր է անվտանգությունը, արդյունավետությունը և մատչելիությունը։
