ԵՐԵՎԱՆ, 3 հոկտեմբերի– Sputnik. ՀՀ ՊՆ ներկայացուցիչ Արծրուն Հովհաննիսյանն այսօր ասուլիսի ընթացքում, անդրադառնալով Մատաղիսի գրամվամն մասին Ադրբեջանի նախագահի հայտարարությանը, նշեց, որ առանձնահատուկ որևէ դիրքի, որևէ ուղղության մասով մարտավարական բնագծերը չեմ կարող ներկայացնել։
«Իրավիճակը բավականին ծանր էր հյուսիսում և հարավում։ Կոնկրետ, թե ով որ պահին որ դիրքի վրա է գտնվում, չեմ կարծում, թե դա այդքան կարևոր իրողություն է։ Մենք բազմիցս ասել ենք, որ դիրքերի և բնագծերի մասին առանձնահատուկ չնշել»,–ասաց Հովհաննիսյանը։
Նրա խոսքով` դիրքային փոփոխությունները շատ հաճախ են լինում, թե առաջ, թե հետ, թե աջ ու ձախ, հետևաբար չի կարելի առանձնահատուկ ֆիքսվել դրա վրա։
Մատաղիսում դրոշ բարձրացնելու՝ Ալիևի հայտարարությունն Արծրուն Հովհաննիսյանին հիշեցրել է հայտնի անեկդոտը. «Ով ինչ ուզի, կասի»։
Նշենք, որ սեպտեմբերի 27–ին մեկնարկած ռազմական գործողություններն առ այսօր շարունակվում են։ Հոկտեմբերի 2–ին և 3–ին թշնամին կրկին հրետակոծել է Ստեփանակերտը` թիրախավորելով խաղաղ բնակչությանը։
Հոկտեմբերի 3-ի ժ. 16։00-ի դրությամբ` հակառակորդի կրակոցների հետևանքով զոհվել են 209 զինծառայողներ և 8 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։ Հակառակորդը նաև զինտեխնկայի զգալի կորուստ ունի և շարունակում է գրանցել։
Ըստ վերջին տվյալների ՝ Ադրբեջանի զինված ուժերը կորցրել են 12 Ինքնաթիռ, 14 ուղղաթիռ, 115 անօդաչու սարք, 3 ՏՈՍ-1 «Սոլնցեպեկ», 2 «Սմերչ» համազարկային կրակի ռեակտիվ համակարգ, 250 տանկ և այլ տեսակի զրահատեխնիկա:
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
