ԵՐԵՎԱՆ, 3 հոկտեմբերի – Sputnik. «Ուրալ», «Տորպեդո» և «Ուֆա» ֆուտբոլային ակումբների նախկին պաշտպան և «Չայկա» ակումբի ներկայիս մարզիչ Դենիս Թումասյանը մեկնել է Արցախ։ Sports.ru կայքին տված հարցազրույցում նա ներկայացրել է Արցախում տիրող իրավիճակը։
«Ադրբեջանական բանակը լկտի ներխուժում է ձեռնարկել Արցախի տարածք։ Բնականաբար, հայ ժողովուրդը ոտքի է կանգնել պաշտպանելու իր պատմականորեն հայկական հողերը»,– ասել է ֆուտբոլիստը։
Նա նաև հայտնել է, որ Ադրբեջանը նախկինում էլ փորձեր ձեռնարկել է ԼՂ–ն գրավելու, բայց հիմա կատարվածն ավելի շատ լայնամասշտաբ պատերազմ է հիշեցնում։
Թումասյանը նաև հայտնել է, որ Ռուսաստանից շատ հայեր արդեն մեկնել են Արցախը պաշտպանելու։
Նշենք` Թումասյանը 2014 թվականից հանդես էր գալիս «Ուֆայում»: 2019թ–ին նրանով հետաքրքրված էր Երևանի «Արարատը»: Կողմերի միջև բանակցություններ էին ընթանում։ Բայց Թումասյանը գերադասեց մնալ ռուսաստանյան ակումբում։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 2-ի ժ. 12-ի դրությամբ` հակառակորդի կրակոցների հետևանքով զոհվել են 158 զինծառայողներ և 7 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
