ԵՐԵՎԱՆ, 2 հոկտեմբերի – Sputnik. Ուկրաինան ռազմական օգնություն չի ցուցաբերի Ղարաբաղյան հակամարտության ոչ մի կողմին։ Այս տեղեկությունը Тwitter-ում գրել է հանրապետության ներքին գործերի նախարար Արսեն Ավակովը։
«Ուկրաինան ադրբեջանա-հայկական հակամարտության մեջ ոչ մի կողմին ռազմական աջակցություն չի ցուցաբերի։ Իսկ ահա բժշկական օգնություն՝ չափից վառ երևակայություն ունեցող պատգամավորների համար, կարելի է ամբողջ երկրով փնտրել»․ - ասել է Ավակովը՝ ակնարկելով Ռադայի պատգամավոր Լյուդմիլա Մարչենկոյին։
Ավելի վաղ Ուկրաինայի իշխող «Ժողովրդի ծառա» կուսակցության կողմից Գերագույն ռադայի պատգամավոր ընտրված Լյուդմիլա Մարչենկոն ասել էր, որ Ուկրաինան պատրաստ է ռազմական օգնություն ցուցաբերել Ադրբեջանին։
«Ուկրաինան այսօր պատրաստ է տարբեր հարթակներում աջակցել Ադրբեջանին։ Դա և՛ ռազմական աջակցությունն է, և՛ հումանիտար օգնություն բոլոր նրանց, ովքեր ապագայում դրա կարիքը կունենան։ Սա պատերազմական իրավիճակ է», -ասել էր խորհրդարանականը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 2-ի ժ. 12-ի դրությամբ` հակառակորդի կրակոցների հետևանքով զոհվել են 158 զինծառայողներ և 7 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։
«Մերոնք նրանց աչքը հանեցին». խոցված ԱԹՍ-ներ ու հրետանային հարվածներ. ռեպորտաժ առաջնագծից
Ըստ այս պահին հայտնի տեղեկությունների` Ադրբեջանը զրկվել է նաև 107 ԱԹՍ–ից, 10 ուղղաթիռից, 205 զրահատեխնիկայից, 5 ինքնաթիռից, 1 «Սմերչից» և 3 «ՏՕՍ» համակարգից։ Արցախում և Հայաստանում ռազմական դրություն և համատարած զորահավաք է հայտարարվել։
Խաթարված մանկությունն ու աչքերի լույսը․ Արցախի երեխաների տպավորիչ ֆոտոշարքը
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
Հայաստանը պատրաստ է բանակցությունների, բայց կա մեկ «բայց». Փաշինյան
