ԵՐԵՎԱՆ, 2 հոկտեմբերի – Sputnik. ԵԱՀԿ Մինսկի խմբի համանախագահները կոչ են անում անհապաղ միջոցներ ձեռնարկել, որպեսզի Ադրբեջանն ու Հայաստանը կարողանան ԵԱՀԿ և ԿԽՄԿ ներկայացուցիչների հետ համատեղ վերցնել զոհված զինծառայողների աճյունները:
Նման հայտարարությամբ են հանդես եկել ԵԱՀԿ Մինսկի խմբի համանախագահները` անդրադառնալով արցախա–ադրբեջանական սահմանին ընթացող գործողություններին։
«Համանախագահները ևս մեկ անգամ կոչ են անում անհապաղ դադարեցնել ռազմական գործողությունները և վերսկսել առանց նախապայմանների առարկայական բանակցությունների»,–նշված է համանախագահների տարածած հայտարարության մեջ։
Համանախագահները խստորեն դատապարտում են շարունակվող բռնությունները Լեռնային Ղարաբաղի հակամարտության գոտում, ինչպես նաև շփման գծից հեռու գտնվող Հայաստանի և Ադրբեջանի տարածքի օբյեկտների դեմ։
Փաշինյանը նորից է խոսել Մակրոնի հետ. քննարկել են Արցախի դեմ ահաբեկիչների ներգրավման հարցը
Նրանք իրենց անհանգստությունն են հայտնում քաղաքացիական բնակչության շրջանում զոհերի թվի ավելացման առնչությամբ։
Քաղաքացիական անձանց վրա հարձակումները կամ հարձակման սպառնալիքը թույլատրելի չէ ոչ մի պարագայում։
ԵԱՀԿ ՄԽ համանախագահները երկու կողմերին կոչ են անում պահպանել քաղաքացիական բնակչության պաշտպանության վերաբերյալ իրենց միջազգային պարտավորությունները։
Շեշտվում է` երրորդ կողմերի ներգրավումը հակամարտությանը խարխլում է տարածաշրջանում կայուն խաղաղության հասնելու ջանքերը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 2-ի ժ. 12-ի դրությամբ` հակառակորդի կրակոցների հետևանքով զոհվել են 158 զինծառայողներ և 7 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
