ԵՐԵՎԱՆ, 2 հոկտեմբերի – Sputnik. «Ժողովրդի ծառա» խմբակցությունից Գերագույն ռադայի պատգամավոր Լյուդմիլա Մարչենկոն հայտարարել է` իբրև թե ԶԼՄ–ներն աղավաղել են «Ադրբեջանին ռազմական և հումանիտար օգնություն ցուցաբերելու` Ուկրաինայի պատրաստակամության վերաբերյալ» իր բառերը։
Բաքվին են ծառայում․ պատգամավորը բացատրել է Կիևի որոշ գործիչների հակահայկական պահվածքը
«ԶԼՄ–ները կոռեկտ չեն մեկնաբանել իմ խոսքերը, չէ՞ որ բոլորս գիտենք` որքան վերնագիրը բարձրագոչ է, այդքան բարձր է նրանց վարկանիշը։ Նշեմ, որ խոսքը զենքի մատակարարման մասին չէր։ Հույս ունեմ, որ Արցախում հակամարտությունը կկարգավորվի խաղաղ ճանապարհով, հարգելով միջազգային իրավունքի նորմերը։ Բոլոր պետությունների ղեկավարները պետք է հասկանան, որ հիմնական առաջնահերթությունը մարդկանց կյանքերն են», – Facebook–ի իր էջում գրել է պատգամավորը։
Մինչ այդ «Ժողովրդի ծառա» կուսակցությունը պաշտոնապես հերքել է պատգամավորի հայտարարությունն այն մասին, որ Ուկրաինան իբրև թե պատրաստակամ է Ադրբեջանին ռազմական ու հումանիտար օգնություն ցուցաբերել։
«Պատգամավորների անձնական կարծիքները խմբակցության ու առավել ևս պետության պաշտոնական դիրքորոշումը չեն։ Այլ պետություններին օգնություն ցուցաբերելու մասին որոշում կարող են ընդունել միայն կառավարությունն ու Ուկրաինայի նախագահը», – գրված է կուսակցության հաղորդագրության մեջ։
Միևնույն ժամանակ կուսակցությունը կոչ է արել իշխանության բոլոր ներկայացուցիչներին լինել կշռադատված իրենց հայտարարություններում և մեկնաբանություններում։
Դեռ մի քանի ժամ առաջ էր Ուկրաինայի ներքին գործերի նախարար Արսեն Ավակովը հերքել Մարչենկոյի հայտարարությունը` խորհուրդ տալով «ամբողջ երկրով դեղահաբեր փնտրել չափազանց վառ երևակայություն ունեցող պատգամավորների համար»։
