ԵՐԵՎԱՆ, 2 հոկտեմբերի – Sputnik. Արցախում ամբողջ բնակչության հաշվով թաքստոցներ կան, այդ առումով որևէ խնդիր չկա։ Լրագրողների հետ ճեպազրույցում այսպիսի հայտարարություն արեց Արցախի պետնախարար Գրիգորի Մարտիրոսյանը։
«Թաքստոցներում առաջացած տարբեր խնդիրները կարող ենք տեղում լուծել»,–ասաց Մարտիրոսյանը։
Անդրադառնալով տարհանման մասին լուրերին` պետնախարարը հայտարարեց, որ մայրաքաղաք Ստեփանակերտից տարհանում չի եղել, և նման որոշում կընդունվի միայն հիմնավոր հանգամանքների դեպքում։
Սակայն, ըստ նրա, որոշակի բնակավայրերից, որոնք սահմանին շատ մոտ են գտնվում, տարհանում եղել է։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Ադրբեջանը երկու օր շարունակ գնդակոծել է Մարտունին. տեսանյութ
Այսօր հակառակորդը խոշոր տրամաչափի զինատեսակներից հրետակոծեց նաև Արցախի մայրաքաղաք Ստեփանակերտը։ Կան բազմաթիվ ավերածություններ, հնարավոր վիրավորների կամ զոհերի մասին դեռևս տվյալներ չեն հրապարակվել։ Միայն հերթական ռմբակոծությունից հետո Արցախի ՄԻՊ Արտակ Բեգլարյանը սոցցանցերի իր էջերում հայտնեց, որ Ստեփանակերտում բազմաթիվ տուժածներ կան։
Հոկտեմբերի 2-ի ժ. 12-ի դրությամբ` հակառակորդի կրակոցների հետևանքով զոհվել են 158 զինծառայողներ և 7 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
