ԵՐԵՎԱՆ, 30 սեպտեմբերի – Sputnik. Գերմանիայի արտգործնախարար Հայկո Մաասին ցնցել է Լեռնային Ղարաբաղի իրադրության սրացման հետևանքով զոհվածների թիվը։ ՌԻԱ Նովոստին հայտնում է, որ նա կողմերին կոչ է արել անհապաղ դադարեցնել ռազմական գործողությունները:
«Մենք քննարկել ենք իրադարձությունների մտահոգիչ զարգացումը։ Այդ ուղղությամբ աշխատանքներ ենք իրականացնում։ Հարյուրավոր զոհեր, որոնց թվում քաղաքացիական անձինք կան։ Ցնցող թվեր են»,– ասել է նա ասուլիսի ժամանակ։
Նախարարը հիշեցրել է, որ Գերմանիան վերջին օրերին բազմաթիվ բանակցություններ է վարում, Մաասն ինքը թուրք գործընկերոջ հետ շփման ժամանակ խոսել է ՄԱԿ-ի Անվտանգության խորհրդի՝ հակամարտության վերաբերյալ բանաձևի մասին։
«Մարտական բոլոր գործողությունները, հատկապես գյուղերի ու քաղաքների գնդակոծությունները պետք է անհապաղ դադարեցվեն, կողմերը պետք է անհապաղ վերադառնան ԵԱՀԿ հովանու ներքո ընթացող բանակցություններին։ Դա մենք կնշենք հետագա բոլոր շփումներում», - հավելել է Մաասը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Վերջին տեղեկություններով` հակառակորդի կրակոցների հետևանքով զոհվել են 80 զինծառայողներ և 6 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։
«Մերոնք նրանց աչքը հանեցին». խոցված ԱԹՍ-ներ ու հրետանային հարվածներ. ռեպորտաժ առաջնագծից
Ըստ այս պահին հայտնի տեղեկությունների` Ադրբեջանը զրկվել է նաև 75 ԱԹՍ–ից, 7 ուղղաթիռից, 137 զրահատեխնիկայից, 1 ինքնաթիռից։ Արցախում և Հայաստանում ռազմական դրություն և համատարած զորահավաք է հայտարարվել։
Ադրբեջանը դարձյալ օդ է բարձրացրել թուրքական F-16 կործանիչները. Հովհաննիսյան
Սեպտեմբերի 29–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։
Հայաստանը պատրաստ է բանակցությունների, բայց կա մեկ «բայց». Փաշինյան
