ԵՐԵՎԱՆ, 29 սեպտեմբերի – Sputnik. Ղարաբաղյան խնդրի բանակցությունները պետք է շարունակվեն այնտեղ, որտեղ սկսվել են` ԵԱՀԿ ՄԽ շրջանակում։ Այսօր «Ռոսիա 1» հեռուստակայանին տված հարցազրույցում հայտարարեց ՀՀ վարչապետ Նիկոլ Փաշինյանը։
Նա նաև շեշտեց, որ բանակցությունների համար հարկավոր է բանակցային մթնոլորտ, և շատ դժվար է ռազմական գործողությունների մթնոլորտում խոսել բանակցությունների, հատկապես դրանց բովանդակության մասին։
«Առաջին հերթին պետք է դադարեցնել բռնությունը, պետք է արձանագրել ու Ադրբեջանը պարտավոր է ընդունել, որ խնդրի կարգավորման ռազմական լուծում գոյություն չունի»,– ասաց Փաշինյանը` հավելելով, որ պատերազմը զրոյից չի սկսվել։ Ադրբեջանի իշխանությունները տևական ժամանակ ատելության խոսքի հռետորաբանություն են կիրառել հայկական կողմի նկատմամբ` միջազգային կոչերին հակառակ` սպառնալով խնդիրը լուծել պատերազմական ճանապարհով։
«Հուսով եմ, որ ներկա իրավիճակն ու այն իրադարձություները, որոնք այս պահին կատարվում են, կհամոզեն Ադրբեջանին, որ ԼՂ խնդիրը պատերազմական լուծում չունի։ Ադրբեջանի ԶՈւ–ն ձախողել է իր ռազմաքաղաքական ղեկավարության առաջադրած խնդիրը` ղարաբաղյան հարցը ռազմական ճանապարհով լուծելու վերաբերյալ»,– ասաց Փաշինյանը։
ՀՀ վարչապետը նաև հայտարարեց, որ Ադրբեջանի նախագահը փորձում է ղարաբաղյան հարցը լուծել միայն Ադրբեջանի համար ընդունելի տարբերակով։
«Դա անհնար է։ Հարկավոր է փոխզիջում։ Իսկ փոխզիջման համար անհրաժեշտ է փոխզիջման մթնոլորտ։ Իսկ դրա համար Ադրբեջանը պետք է անմիջապես դադարեցնի ԼՂ–ի ու Հայաստանի նկատմամբ ագրեսիան»,– ասաց ՀՀ վարչապետը։
Փաշինյանը շեշտեց նաև, որ հայկական երկու հանրապետությունների դեմ ագրեսիան Ադրբեջանը անսպասելի չի սկսել։ Դա եղել է նախապես ծրագրված գործողություն ու ծրագրվել է Թուրքիայի ԶՈւ–ի հետ համատեղ զորավարժությունների ընթացքում։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Վերջին տեղեկություններով` հակառակորդի կրակոցների հետևանքով զոհվել են 80 զինծառայողներ և 3 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։
ԱԳՆ-ն հերքում է. Հայաստանն Ադրբեջանի Դաշքեսանի շրջանը չի հրթիռակոծել
Ըստ այս պահին հայտնի տեղեկությունների` Ադրբեջանը զրկվել է նաև 52 ԱԹՍ–ից, 6 ուղղաթիռից, 92 զրահատեխնիկայից, 1 ինքնաթիռից և 82 ավտոտրանսպորտից։ Արցախում և Հայաստանում ռազմական դրություն և համատարած զորահավաք է հայտարարվել։
Ադրբեջանի ԶՈւ–ի թիրախ դարձած Մարտունին «Գրադից» հետո. լուսանկարներ, տեսանյութ
Սեպտեմբերի 29–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։
