Հայկական միասնական տեղեկատվական կենտրոնը մի տեսանյութ է հրապարակել, որտեղ արցախցի խաղաղ բնակիչը պատմում է, թե ինչ է կատարվել ադրբեջանական հրետակոծության օրը։ Հրետակոծության հետևանքով Իգոր Գրիգորյանը կորցրել է իր 9-ամյա դստերը: Կինն ու որդին ծանր վիճակում են:
«Տեսել էինք, որ անօդաչու թռչող սարքեր են գալիս, երեխեքին դուրս էինք հանել, որ մի ձև թաքցնենք, չենք հասցրել։ Իրենք փոքր երեխեքին են վնասում, իրանք մենակ ըտենց են կամենում ու ըտենց են կարողանում անել»,–պատմում է զավակ կորցրած տղամարդը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։ Ըստ վերջին տեղեկությունների` հակառակորդի կրակոցների հետևանքով զոհվել են 84 զինծառայողներ և 3 քաղաքացիական անձինք։
Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։
Վիրավորների տարհանման ևս մի կետ կլինի Վարդենիսում
Ըստ վերջին տեղեկությունների` Ադրբեջանը զրկվել է նաև 49 ԱԹՍ–ից, 4 ուղղաթիռից, 80 զրահատեխնիկայից, 1 ինքնաթիռից և 82 ավտոտրանսպորտից։ Արցախում և Հայաստանում ռազմական դրություն և համատարած զորահավաք է հայտարարվել։
