ԵՐԵՎԱՆ, 29 սեպտեմբերի – Sputnik. Առողջապահության նախարարության պրոֆեսոր Յոլյանի անվան արյունաբանական կենտրոնը տեղեկացնում է, որ այս պահին արյան անհրաժեշտ խմբաքանակը համալրվել է։
«Արյունաբանական կենտրոնն իր շնորհակալությունն է հայտնում բոլոր այն կամավորներին, ովքեր միացան մեր կոչին և կատարեցին արյունատվություն: Այս պահին խնդրում ենք չայցելել Արյունաբանական կենտրոն, քանի որ անհրաժեշտ խմբաքանակը համալրվել է»,–նշված է կենտրոնի Facebook սոցցանցի էջում։
Միաժամանակ կենտրոնը վստահեցնում է, որ անհրաժեշտության դեպքում կրկին կտեղեկացնեն:
Հիշեցնենք` մի շարք հիվանդանոցների առջև արդեն երկու օր է` հերթեր են. բազմաթիվ մարդիկ են այցելում, որպեսզի արյուն հանձնեն վիրավորների համար։
Սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։ Ըստ վերջին տեղեկությունների` հակառակորդի կրակոցների հետևանքով զոհվել են 84 զինծառայողներ և 3 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։
Ըստ վերջին տեղեկությունների` Ադրբեջանը զրկվել է նաև 50 ԱԹՍ–ից, 4 ուղղաթիռից, 80 զրահատեխնիկայից, 1 ինքնաթիռից և 82 ավտոտրանսպորտից։ Արցախում և Հայաստանում ռազմական դրություն և համատարած զորահավաք է հայտարարվել։
