ԵՐԵՎԱՆ, 29 սեպտեմբերի– Sputnik. ԱՀ նախագահ Արայիկ Հարությունյանն ու ՀՀ փոխվարչապետ Տիգրան Ավինյանն Արցախում հանդիպել են կամավորականներին:
«Բոլորի մոտ առկա է հաղթական տրամադրություն: Հայրենիքի հանդեպ մեր փայփայած նվիրական սերն ու պաշտամունքը խորապես նստած է յուրաքանչյուրիս գիտակցության մեջ, և դրա վառ արտահայտությունը, անկախ մեր կրթական և սոցիալական աստիճանից, տեսանելի է այս օրերին»,– գրել է նախագահ Հարությունյանը։
Նա նշել է` մեր գործողություններով վճռական ենք մեր պայքարում։ Նախագահն ընդգծել է` նախնիներից ժառանգածը պարտավոր ենք սրբորեն պահել և փոխանցել մեր սերունդներին:
«Հաղթելու ենք, որովհետև ազգովի կարող ենք, որովհետև արդար ենք մեր մղումներում, որովհետև այդպիսին է մեր ճակատագիրը»,– եզրափակել է Արցախի նախագահը։
Նախագահն ընդգծում է` խուճապ չկա, հրամանատարներն իրավիճակի մասին զեկուցում են այնպես, կարծես սովորական զորավարժություն լինի։ Որպես օրինակ Հաթերքի գումարտակի հրամանատարի հետ զրույցի մասին է պատմում։
«Ասում եմ` ինչ կա։ Ասում է` դե ամեն դիրքի վրա հարյուրից ոչ պակաս հարձակվել են, հիմնականում հետ ենք մղել, ամեն ինչ նորմալ ա, մի խումբ էստեղ ա, հիմա էդ էլ ենք հետ մղում»,– ասում է նախագահը։
Հետո շարունակում է, թե երբ հրամանատարներին հարցնում է` ինչի կարիք կա, պատասխանը նույնն է` ամեն ինչով ապահովված ենք։
«Տանկերով գալիս են, խփում ենք, վառվում են... Խփում ենք, վառվում են... Ոչ հաշվում ենք` քանի հատ ենք խփել, ոչ էլ հավես ունենք հաշվելու։ Խփելու ենք էնքան, մինչև ուշքի գան»,– անդրադառնալով ադրբեջանական ոչնչացված զինտեխնիկային` ասում է նախագահ Հարությունյանը։
Շեշտում է`հայրենիքի պաշտպանները մինչև վերջ կանգնած են լինելու։ «Մենք չենք խնդրելու զինադադար, մենք պետք է պարտադրենք զինադադար։ Եթե մենք խնդրենք զինադադար, դա լինելու է Հայաստանի վախճանը, ոչ թե Արցախի։ Կռվում ենք ոչ թե Ադրբեջանի դեմ, այլ` Թուրքիայի։ Թուրքիային հետաքրքիր չէ Արցախը, Ջաբրայիլը, Լաչինը, Հորադիզը, Թուրքիային հետաքրքիր է Հայաստան աշխարհն ամբողջությամբ»,– ասում է նախագահը` նշելով, որ մեր հարևանն իր պանթյուրքական ծրագիրն է հետապնդում։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Վերջին տեղեկություններով` հակառակորդի կրակոցների հետևանքով զոհվել են 80 զինծառայողներ և 3 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդի կորուստներն անհամեմատ մեծ են։
ԱԳՆ-ն հերքում է. Հայաստանն Ադրբեջանի Դաշքեսանի շրջանը չի հրթիռակոծել
Ըստ այս պահին հայտնի տեղեկությունների` Ադրբեջանը զրկվել է նաև 52 ԱԹՍ–ից, 6 ուղղաթիռից, 80 զրահատեխնիկայից, 1 ինքնաթիռից և 82 ավտոտրանսպորտից։ Արցախում և Հայաստանում ռազմական դրություն և համատարած զորահավաք է հայտարարվել։
Ադրբեջանի ԶՈւ–ի թիրախ դարձած Մարտունին «Գրադից» հետո. լուսանկարներ, տեսանյութ
Սեպտեմբերի 29–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։
