ԵՐԵՎԱՆ, 27 սեպտեմբերի– Sputnik. ՀՀ պաշտպանության նախարարությունը ԶԼՄ-ներին և սոցցանցերի օգտատերերին կոչ է անում զերծ մնալ չստուգված, ոչ պաշտոնական տեղեկատվություն տարածելուց։ ՀՀ պաշտպանության նախարարության մամուլի ծառայությունը հաղորդագրություն է տարածել` նախազգուշացնելով, որ բուն մարտական գործողություններին զուգահեռ տեղեկատվական լայնամասշտաբ հարձակում է սկսվել։
«Անհրաժեշտ է հստակ գիտակցել, որ հակառակորդը, բացի բուն մարտական գործողություններից, իրականացնում է նաև տեղեկատվական լայնամասշտաբ հարձակում հնարավոր բոլոր խողովակներով, ինչը ենթադրում է հսկայական ծավալով ապատեղեկատվության տարածում՝ մասնավորապես նաև սոցիալական հարթակներում»,– նշված է հաղորդագրության մեջ։
ՊՆ–ն հորդորում է զգոնություն ցուցաբերել և կամա թե ակամա հակառակորդի ձեռնարկած հերթական սադրանքի մասնակիցը չդառնալ։
Հիշեցնենք՝ այսօր վաղ առավոտյան Ադրբեջանը լայնածավալ ռազմական հարձակում է սկսել ԼՂՀ սահմանի ողջ երկայնքով:
Օդային և հրետանային հարվածներ են հասցվել արցախի մայրաքաղաք Ստեփանակերտին:
