ԵՐԵՎԱՆ, 25 սեպտեմբերի – Sputnik. ՍԴ դատավոր Էդգար Շաթիրյանը, ի տարբերություն ՍԴ նախկին նախագահ Հրայր Թովմասյանի, այնպիսի տպավորություն չունի, թե ՍԴ նախագահի պաշտոնում դատավոր Երվանդ Խունդկարյանի առաջադրվելն իշխանությունների հետ պայմանավորվածության հետ կապ ունի։ Շաթիրյանը նման կարծիք հայտնեց լրագրողների հետ զրույցում` պատասխանելով հարցին, թե նա նույնպե՞ս կարծում է, որ ՍԴ նախագահի ընտրության հարցում ամեն ինչ կանխավ պլանավորված էր։
Հրայր Թովմասյանը երեկ` ՍԴ նիստից հետո, լրագրողներին ասել էր, որ չի մասնակցի այսօր կայանալիք ՍԴ նախագահի ընտրությանը։ Թովմասյանը կարծում է, որ իր տպավորությամբ՝ այս ամենն ուղղորդված ու թելադրված է։ Երեկ հայտնի դարձավ, որ Երվանդ Խունդկարյանն ինքնառաջադրվել է ՍԴ նախագահ դառնալու համար, իսկ Թովմասյանն առաջադրել էր Աշոտ Խաչատրյանի թեկնածությունը։ Վերջինս ինքնաբացարկ էր հայտնել։
«Ես նման տպավորություն չունեմ։ Ինձ մոտ նման մտայնություն չկա, որ Երվանդ Խունդկարյանն ի սկզբանե եկել է ՍԴ` հատուկ նախագահ դառնալու համար»,–ասաց Շաթիրյանը։
Նրա խոսքով` Խունդկարյանի թեկնածության առնչությամբ արդեն իսկ հստակ դիրքորոշում ունի, որը դեռ հայտնել չի կարող, քանի որ քվեարկության պետք է մասնակցի։ Շաթիրյանը, սակայն, մի քանի հարց է պատրաստել, որոնք պետք է ուղղի Խունդկարյանին։
«Ես եմ առաջադրել Աշոտ Խաչատրյանի թեկնածությունը». Թովմասյանը զարմացած է
Հարցին, թե ինչպե՞ս է ստացվում ՍԴ աշխատանքը, արդյոք ՍԴ հին և նոր դատավորները լեզու գտնո՞ւմ են իրար հետ, Շաթիրյանը պատասխանեց, որ տարբեր հարցերի, երևույթների շուրջ մոտեցումները կարող են տարբեր լինեն, կարող է բուռն բանավեճ լինել, ինչը նորմալ է։ Ինչ վերաբերում է «լեզու գտնելուն», ապա դա, ըստ Շաթիրյանի, ծայրահեղական բնութագրում է։
Ճշգրտմանը, թե հնարավո՞ր է, որ այսօր էլ ՍԴ նախագահ չընտրվի, Շաթիրյանը պատասխանեց, որ տեսականորեն ոչինչ չի բացառում։
Հիշեցնենք՝ ՍԴ նախագահ ընտրելու օրակարգով ՍԴ–ում նիստ է անցկացվում դեռ սեպտեմբերի 23-ից։ Սահմանադրական դատարանի նախագահն ու փոխնախագահն ընտրվում են վեց տարի ժամկետով` առանց վերընտրվելու իրավունքի:
«Հիմա դուք ասեք` ես ո՞ր իշխանության մարդն եմ». Երվանդ Խունդկարյան
