ԵՐԵՎԱՆ, 22 սեպտեմբերի – Sputnik. Արագածոտնի մարզպետ Դավիթ Գևորգյանը կորոնավիրուսով է վարակվել։ Տեղեկությունը Facebook սոցցանցի իր էջում հայտնել է Գևորգյանը` նշելով, որ կրկնակի թեստի պատասխանը ևս դրական է եղել:
«Հետազոտություններ անցնելուց հետո ինձ մոտ ախտորոշվեց երկկողմանի զարգացող թոքաբորբ՝ առողջական վիճակի որոշակի բարդացումով, և բժիշկների ցուցմանը համաձայն՝ բուժումն անհրաժեշտ է շարունակել բժշկական հսկողության պայմաններում: Սեպտեմբերի 18-ից ստանում եմ հիվանդանոցային բուժում»,–գրել է մարզպետը։
Նա շնորհակալություն է հայտնել բժիշկներին, բոլոր բուժաշխատողներին, հիվանդանոցի սպասարկող անձնակազմին, որոնք իրենց պրոֆեսիոնալ աշխատանքի և մարդկային ջերմ վերաբերմունքի շնորհիվ անում են առավելագույնը, որպեսզի բոլոր հիվանդներն օր առաջ առողջանան:
Գևորգյանը տեղեկացրել է, որ իր բացակայության ընթացքում իրեն կփոխարինի մարզպետի տեղակալ Հարություն Գուլյանը:
Հիշեցնենք, որ վերջին մեկ օրում Հայաստանում կորոնավիրուսով վարակվածների թիվն ավելացել է ևս 115-ով և հասել 47667-ի։
