ԵՐԵՎԱՆ, 22 սեպտեմբերի - Sputnik. Հոկտեմբերի 8-ին ԲՀԿ–ն ՀՅԴ–ն ու «Հայրենիք» կուսակցությունը համատեղ հանրահավաք են նախապատրաստում։ Տեղեկությունն այսօր ԱԺ–ում լրագրողների հետ ճեպազրույցում հայտնեց «Բարգավաճ Հայաստան» խմբակցության անդամ Իվետա Տոնոյանը։
«Կա գործակցություն` եռյակի ձևաչափով, և մենք նպատակահարմար ենք գտել բոլոր երեք գործընկերներով միասնական հանդես գալու, քանի որ մեր օրակարգը միասնական է»,– ասաց նա։
Պատգամավորը վստահեցրեց, որ այլ քաղաքական ուժերի հետ միավորումը չի նշանակում, թե ԲՀԿ–ն մտավախություն ունի, որ միայնակ չէր կարող մեծ հանրահավաք կազմակերպել։
Բյուջեի գումարն օդից չի գալիս, դա ժողովրդինն է. Ծառուկյանը՝ մեծ հանրահավաք անելու մասին
«Մենք ամենատարբեր ոլորտներից ստանում ենք ազդակներ, որ կան խնդիրներ բոլոր ոլորտներում, այնպես որ այստեղ հանրային վստահության մտավախություն լինել չի կարող»,– նշեց Տոնոյանը։
Թե ովքեր և ինչ թեմայով ելույթներ են ունենալու նախատեսվող հանրահավաքում, Տոնոյանի խոսքով, դեռ վերջնականապես որոշված չէ։ ԲՀԿ խոսնակը խոստացավ տեղեկացնել, երբ հստակեցված կլինի։
