ԵՐԵՎԱՆ, 21 սեպտեմբերի — Sputnik. Հայաստանի վարչապետ Նիկոլ Փաշինյանը Անկախության օրվա կապակցությամբ ներկայացրեց Հայաստանի՝ մինչև 2050 թ. վերափոխման ռազմավարությունը։ Փաշինյանն ասաց, որ նման ամբողջական փաստաթուղթ Հայաստանում պետական մակարդակով չի եղել վերջին 30 տարիների ընթացքում։
Փաշինյանի խոսքով՝ ռազմավարական կարևոր գաղափարը Հայաստանի հանդեպ միլիոնավոր անհատների վերաբերմունքը փոխելն է: Նա նշեց` երկրի զարգացման ռազմավարությունը պետք է կառուցվի այնպես, որ ամբողջ աշխարհից մարդիկ ձգտեն գալ Հայաստան՝ ներդրումներ կատարելու, բիզնես անելու, հանգստանալու համար։
ՀՀ վարչապետը նշեց, թե ինչպիսի ցուցանիշներ են ակնկալվում 2050-ին։ Առաջին հերթին նախատեսվում է բնակչության թվաքանակը հասցնել 5 միլիոնի, ստեղծել 1,5 միլիոն նոր աշխատատեղ, հաղթահարել աղքատությունը, 20 անգամ ավելացնել ՀՆԱ-ն, 7 անգամ ավելացնել միջին աշխատավարձը, կյանքի սպասվող տևողությունը բարձրացնել մինչև 90 տարի:
Վարչապետը խնդիր է դնում նշված ժամկետում ունենալ ամենամարտունակ բանակը, աշխարհի 10 ամենաարդյունավետ հետախուզական ծառայություններից մեկը ստեղծել, աշխարհի 200 լավագույն բուհերում ունենալ առնվազն երեք հայկական այդպիսի բուհ։
Ռազմավարությունը ենթադրում է, որ Հայաստանը կդառնա բարձր տեխնոլոգիական արդյունաբերական երկիր։ Նախատեսվում է ունենալ մինչև 10 մլրդ և ավելի արժեքով առնվազն 5 տեխնոլոգիական ընկերություն և առնվազն 10 000 աշխատող ստարտափ։
Բացի այդ, վարչապետն ուզում է կրկնապատկել հանրապետությունում անտառային զանգվածների մակերեսը, Հայաստան զբոսաշրջիկների տարեկան հոսքը հասցնել 15 միլիոնի։
Արտաքին և ներքին ինչ մարտահրավերներ կան անկախ Հայաստանի առաջ. մեկնաբանում է քաղաքագետը
Միջազգային հարթակներում նույնպես անելիքներ կան` մինչև 2050 թվականը Հայաստանը պետք է նվաճի 25 ոսկե օլիմպիական մեդալ, ստանա շախմատի աշխարհի անհատական չեմպիոնի կոչում, իսկ ֆուտբոլի հավաքականը` մեդալ բերի աշխարհի կամ Եվրոպայի առաջնություններից:
Վարչապետի խոսքով ՝ նշված դրույթները պետք է լինեն առաջիկա 30 տարիներին Հայաստանի իշխանությունների հիմնական ուղեցույցները:
