ԵՐԵՎԱՆ, 18 սեպտեմբերի - Sputnik. ՀՀ ոստիկանության պետ Վահե Ղազարյանն այսօր ընդունել է Հայաստանի Հանրապետությունում Ռուսաստանի Դաշնության արտակարգ և լիազոր դեսպան Սերգեյ Կոպիրկինին։ Ոստիկանության մամուլի ծառայության հաղորդմամբ՝ ոստիկանապետը կարևորել է երկու երկրների միջև բարեկամական սերտ հարաբերություններն ու հատկապես Հայաստանի ոստիկանության և Ռուսաստանի ներքին գործերի նախարարության միջև ամենօրյա ակտիվ փոխգործակցությունը։
Օգտվելով առիթից՝ Վահե Ղազարյանը շնորհավորել է մեր երկրում ՌԴ ՆԳՆ նորանշանակ ներկայացուցիչ Գրիգորի Պուստովիտովին, մաղթել արդյունավետ աշխատանք։
«Սերգեյ Կոպիրկինը, շնորհակալություն հայտնելով ջերմ ընդունելության համար, մատնանշեց երկու պետությունների իրավապահ կառույցների ինչպես երկկողմ, այնպես էլ ՀԱՊԿ շրջանակներում սերտ փոխգործակցությունը։ Նա խոսեց անցած տարի Հայաստանում տեղի ունեցած Հայաստանի ոստիկանության և Ռուսաստանի ներքին գործերի նախարարության միավորված կոլեգիայի նիստի մասին և վստահություն հայտնեց, որ ձևավորված սերտ համագործակցությունն ավելի կզարգանա»,- նշված է հաղորդագրության մեջ։
Լևոն Տեր-Պետրոսյանը հանդիպել է Ռուսաստանի դեսպան Սերգեյ Կոպիրկինի հետ
Հանդիպմանը ընթացքում ոստիկանապետի տեղակալ Արա Ֆիդանյանը ներկայացրել է ոստիկանությունում ընթացող բարեփոխումները, ինչպես նաև քննարկվել են կողմերին հետաքրքրող այլ հարցեր։
