ԵՐԵՎԱՆ, 17 սեպտեմբերի - Sputnik. Ռ․ Յոլյանի անվան արյունաբանության կենտրոնի տնօրեն Սամվել Դանիելյանը կշարունակի պաշտոնավարել։ Այս մասին որոշումը է կայացրել վարչապետ Նիկոլ Փաշինյանը։
«Առողջապահության նախարարին հանձնարարեցի երկարացնել Ռ. Յոլյանի անվան Արյունաբանական կենտրոնի տնօրենի հետ աշխատանքային պայմանագիրը», – Facebook-ի իր էջում գրել է նա։
Արյունաբանական կենտրոնի ավելի քան 50 աշխատակից սպառնում էին ազատման դիմում գրել, եթե Սամվել Դանիելյանի հետ աշխատանքային պայմանագիրը չշարունակվեր։ Նույն պահանջով աշխատանքից ազատման դիմում էր գրել Հայաստանի մանկական քաղցկեղի և արյան հիվանդությունների կենտրոնի տնօրեն Գևորգ Թամամյանը։
Փաշինյանը արձագանքել է նաև բժիշկների համատարած դիմումներին` ասելով, որ այդ կեցվածքը անարձագանք չի մնա։
Արյունաբանականի նախկին տնօրենին մեղադրանք է առաջադրվել. ո՞րն է խնդիրը
«Տարակուսած եմ, որ այս պատմության ընթացքում որոշ բժիշկների կողմից թեկուզ ոչ ուղղակի սպառնալիք է հնչել հիվանդ երեխաներին թողնել առանց խնամքի: Եթե նրանք երեխաներին բուժում են այնպես, ինչպես խոսում են, մտածելու շատ լուրջ բան ունենք: Ամեն դեպքում նման կեցվածքը չի կարող անարձագանք մնալ, առնվազն ստուգելու համար տպավորությունների եւ իրականության հարաբերությունները»,– նշել է վարչապետը։
Ավելի վաղ Առողջապահության նախարարությունը որոշում էր կայացրել չշարունակել հիվանդանոցի տնօրենի՝ Սամվել Դանիելյանի հետ պայմանագիրը։ Հաջորդ օրը հիվանդանոցի 41 աշխատակից նամակով դիմել էր վարչապետ Նիկոլ Փաշինյանին՝ որոշումը վերանայելու խնդրանքով։ Մեկ օր անց նրանց միացան ևս 13 աշխատակիցներ։ Բացի այդ, Հայաստանի մանկական քաղցկեղի և արյան հիվանդությունների կենտրոնի տնօրեն Գևորգ Թամամյանը նույնպես ազատման դիմում էր ներկայացրել՝ նույն պատճառով։
