ԵՐԵՎԱՆ, 16 սեպտեմբերի - Sputnik. Մեկնարկել է ՀՅԴ Հայաստանի երիտասարդական միության երթը «Հանուն ազգային և առաջադեմ կրթության» կարգախոսով. պահանջը ԿԳՄՍ նախարար Արայիկ Հարությունյանի հրաժարականն է։ Երթի մասնակիցները Մատենադարանի մոտից շարժվում են դեպի նախարարություն։ ՀՅԴ ՀԵՄ ԿՎ անդամ Քրիստինե Վարդանյանը նշեց, որ այս հարցում բաց են համագործակցության համար բոլոր այն ուժերի հետ, որոնց հետո չունեն սկզբունքային և մարտավարական տարաձայնություններ և որոնց նպատակներն ազնիվ են։ Նրա խոսքով՝ արդյունքի հնարավոր է հասնել հանրային համախմբման շնորհիվ։
Անդրադառնալով Արայիկ Հարությունյանի՝ այսօր կատարած այն հայտարարությանը, թե «ՀՅԴ-ի դեմ քրեական գործերն արկղերով նրանց ուղարկելը մի քանի ժամվա հարց է», Վարդանյանը նշեց, որ ամեն անգամ, երբ իրավիճակը լարվում է, նախարարը քրեական գործերով է սպառնում։ Նրա կարծիքով՝սա վկայում է այն մասին, որ եթե կան խախտումներ, նախարարը թաքցնում է դրանք և օգտագործում է իր քաղաքական հակառակորդների նկատմամբ որպես «կոմպրոմատներ»։
«Մենք կաշկանդված չենք որևէ քրեական գործով։ Ով խախտել է ՀՀ օրենսդրությունը, պետք է պատասխան տա, բայց նախարարի պնդումներն այնքան անհիմն են, որ դեռ ընթացքի մեջ գտնվող գործերը նա վերագրում է մեկ քաղաքական պաշտոնյայի և նրան մեղադրում ինչ-որ հանցանքներում։ Այդ դեպքում մենք էլ իրեն ենք մեղադրում, որովհետև նման մի գործով հիմա իր փոխնախարարներից մեկն է անցնում»,- հայտարարեց Վարդանյանը՝ նշելով, որ մերժում են «կոմպրոմատային քաղաքականությունը»։
Ասում է՝ եթե հիմնավոր փաստեր կան, պատրաստ են նրա հետ գնալ, ոստիկանությանը հանձնել այդ պաշտոնյային, միայն թե մի պայմանով՝ դրանից հետո ինքը պետք է հրաժարական տա։
Մի քանի րոպե` լրատվամիջոցների հետ Արայիկ Հարությունյանի «ջերմ» շփումից. տեսանյութ
Նրա խոսքով՝ այսօր կազմակերպված երթը 11 ամիս առաջ սկսած պայքարի շարունակությունն է, որը պարզապես ընդհատվեց համավարակի պայմաններում քաղաքացիների առողջության պահպանման նկատառումներով։ Պայքարի հարցում վճռական են, կանգ չեն առնելու մինչև տրամաբանական ավարտին չհասնեն։
Հիշեցնենք` Արայիկ Հարությունյանի համակարգած ոլորտներում առկա դժգոհությունների պատճառով ԱԺ «Լուսավոր Հայաստան» խմբակցությունը Ազգային ժողովում հարցապնդում է ներկայացրել նախարարի հրաժարականի պահանջով։
