ԵՐԵՎԱՆ, 16 սեպտեմբերի - Sputnik. Ազգությամբ հայերը կարող են Հայաստանի քաղաքացիություն ստանալ պարզեցված ընթացակարգով, մասնավորապես՝ առանց ՀՀ-ում վերջին 3 տարում օրինական հիմունքներով բնակվելու, Սահմանադրության և հայոց լեզվի իմացության վերաբերյալ թեստ հանձնելու։ Տեղեկությունը հայտնում է ՀՀ ոստիկանության մամուլի ծառայությունը։
Վերջին շրջանում սփյուռքահայ տարբեր համայնքներից, մասնավորապես՝ Լիբանանից Հայաստան են ժամանում մեծ թվով հայեր։ Ոստիկանության հասարակայնության հետ կապի և լրատվության վարչությունը, համագործակցելով սփյուռքի գործերի գլխավոր հանձնակատարի գրասենյակի հետ, սկսել է իրազեկումների շարք։
Դրանց մի մասը վերաբերում են քաղաքացիություն կամ կացության իրավունք ստանալու կարգին։
«Ազգությամբ հայերը քաղաքացիություն ստանալու համար դիմում են ԱՎ վարչություն կամ օտարերկրյա պետություններում ՀՀ դիվանագիտական ներկայացուցչություններ կամ հյուպատոսական հիմնարկներ՝ ներկայացնելով հետևյալ փաստաթղթերը՝ սահմանված կարգի դիմում, լրացնում են դիմում-հարցաթերթիկ՝ հայերենով, իրենց անձնագիրը և դրա նոտարական վավերացմամբ թարգմանությունը, 6 գունավոր լուսանկար, ծննդյան վկայականը և դրա նոտարական թարգմանությունը, իսկ եթե օտարալեզու է, ազգությամբ հայ լինելու հանգամանքը հավաստող փաստաթղթեր, որոնք սահմանված են համապատասխան նորմատիվային որոշմամբ, նաև պետական տուրքի վճարման անդորրագիր, որը 1000 դրամ է։ Քաղաքացիություն ստանալու դիմումները ներկայացվում են անձամբ՝ բացառությամբ անգործունակ ճանաչված քաղաքացիների, որոնց դեպքում դիմումը ներկայացվում է խնամակալի միջոցով։ Դիմումները քննարկվում են վեցամսյա ժամկետում, և քաղաքացիության հարցերը լուծվում են ՀՀ նախագահի հրամանագրով»,- նշում է ոստիկանության անձնագրային և վիզաների վարչության իրավաբանական բաժանմունքի պետ Իրինա Մկրտչյանը։
Ողբերգությունից մեկ ամիս անց ինչ տեսք ունի Բեյրութը. տեսանյութ
Ինչ վերաբերում է վարորդական իրավունքի վկայականին, ապա ոստիկանությունից տեղեկացնում են՝ քանի որ Լիբանանը չի միացել 1968 թվականի Վիեննայի միջազգային երթևեկության մասին կոնվենցիային, հետևաբար լիբանանյան ազգային վարորդական իրավունքի վկայականներով ոչ միայն մեր հայրենակիցները, այլև ցանկացած քաղաքացի իրավունք չունի տրանսպորտային միջոց վարել ՀՀ-ում։
Դա նշանակում է, որ պետք է Հայաստանում վարորդական իրավունք ստանալ, դրա համար էլ անհրաժեշտ է համապատասխան քննություն հանձնել։
«Գործող իրավակարգավորումներով և հնարավորություններով` տեսական քննություն կարելի է հանձնել դեռևս միայն հայերեն ու ռուսերեն։ Առաջիկայում կավելացվեն նաև արաբերեն, պարսկերեն և անգլերեն լեզուները», - տեղեկացնում է ՃՈ բաժնի պետի տեղակալ Սամվել Ներսիսյանը։
Նշենք, որ համավարակով պայմանավորված՝ ճանապարհային ոստիկանության հաշվառման-քննական ստորաբաժանումները աշխատում են նախապես օնլայն հերթագրմամբ։ Պետք է էլեկտրոնային փոստին ուղարկել դիմում և ստանալ քննության օրն ու ժամը։ Անհրաժեշտ էլեկտրոնային հասցեները կարելի է գտնել police.am կայքում։
Սփյուռքահայ 24 մասնագետներ կաշխատեն ՀՀ կառավարությունում․ նաև Լիբանանից ներկայացուցիչ կա
