ԵՐԵՎԱՆ, 13 սեպտեմբերի – Sputnik. Հայ գրոսմայստեր Լևոն Արոնյանը մեկը մյուսի հետևից երեք հաղթանակ է տարել Սենտ-Լուիսի շախմատային ակումբի կազմակերպած Champions Showdown Chess 9LX առցանց առաջնության ընթացքում:
Այսպես՝ 4-րդ տուրում շախմատիստը հաղթել է իրանցի մրցակից Ալիռեզա Ֆիրուջային (որը հանդես է գալիս Շախմատի միջազգային ֆեդերացիայի դրոշի ներքո), 5-րդ տուրում՝ Պյոտր Սվիդլերին(Ռուսաստան), իսկ 6-րդում գերազանցել է Լենյեր Դոմինգեսին (ԱՄՆ)։
Արոնյանը 4,5 միավոր է հավաքել և մրցաշարային աղյուսակի առաջին տեղում է։
Մրցաշարն անցկացվում է Ֆիշերի շախմատի կանոններով՝ տասը մասնակիցները միմյանց հետ խաղում են 20'+10'' վերահսկողությամբ։
«Ամոթ և խայտառակություն». հայ շախմատիստները քննադատել են ՖԻԴԵ-ին
Մրցաշարին մասնակցում են նաև աշխարհի գործող չեմպիոն Մագնուս Կառլսենը, նախկին չեմպիոն Գարրի Կասպարովը, ինչպես նաև ամերիկացիներ Ֆաբիանո Կարուանան, Հիկարու Նակամուրան, Ուեսլի Սոն, ֆրանսիացի Մաքսիմ Վաշիե-Լագրավը, ադրբեջանցի Թեյմուր Ռաջաբովը։
