ԵՐԵՎԱՆ, 1 սեպտեմբերի – Sputnik. Հայաստանի քաղաքացիները, այդ թվում՝ կանայք ու երեխաներ, Վերին Լարս անցակետ (ռուս-վրացական սահման) են եկել ու փորձում են ցամաքային ճանապարհով՝ Վրաստանի տարածքով, Հայաստան վերադառնալ։ Տեղեկությունը Sputnik Արմենիայի հետ զրույցում հայտնեց Հայաստանի դեսպանատանը կից մաքսային կցորդ Արամ Թանանյանը։
«21 մարդ անցակետի մոտ է։ Նրանք ութ մեքենայով են․ մեքենաները բեռնված են անձնական իրերով։ Մարդիկ կարծում էին, որ այսօրվանից թույլատրվում է անցակետով անցնել», - ասաց Թանանյանը։
Բացատրական աշխատանքից հետո քաղաքացիները հեռացել են անցակետից, այժմ նրանք Լարսից 10 կիլոմետր հեռավորության վրա գտնվող Չմի գյուղում են։ Տեղանքում փոքր խանութ ու հանրային սննդի կետ կա, որոնցից հաճախ ֆուրերի վարորդներ են օգտվում։
Մեքենաների մեջ հիմնականում այն մարդիկ են, որոնք Ռուսաստանում անգործ են մնացել ու որոշել են հայրենիք վերադառնալ, սակայն ինքնաթիռի տոմսի գումար չունեն։ Շատերի անձնագրերի ժամկետներն անցել են, մեքենաների փաստաթղթերի հետ կապված խնդիրներ ունեն։
Հիշեցնենք՝ Վրաստանում մարտից օտարերկրացիների մուտքի արգելք է գործում։ Արգելքը չի տարածվում բեռնափոխադրումների վրա։
ՀՀ մի խումբ քաղաքացիներ ապօրինի հատել են Վրաստանի սահմանը. տեսանյութ
«Կազբեգ» - «Վերին Լարս» սահմանային անցումը Հայաստանն ու Ռուսաստանը կապող միակ ցամաքային ճանապարհն է։
ՀՀ արտաքին գործերի նախարարությունը բազմիցս ասել է, որ հանրապետության քաղաքացիները կարող են իրենց մեքենաներով ցամաքային ճանապարհով հայրենիք վերադառնալ միայն Վրաստանի կառավարության որոշման չեղարկումից հետո։
