ԵՐԵՎԱՆ, 28 օգոստոսի – Sputnik. ՀՀ Շրջակա միջավայրի նախարար Ռոմանոս Պետրոսյանը տեղեկացնում է, որ Հայաստանի Կարմիր գիրքը վերջին անգամ թարմացվել է 2010 թվականին։ Նախորդ տարբերակը հրատարակվել էր դրանից 20 տարի առաջ՝ 1990-ին։
«20 տարիների ընթացքում կենսաբազմազանության օգտագործումը հանրապետությունում հիմնականում ընթացել է առանց հաշվի առնելու կենսապաշարների վերարտադրության ապահովման բնական հնարավորությունները։ Օգտագործման այսպիսի մոտեցման արդյունքում աստիճանաբար տեղի է ունեցել տեսակների դեգրադացիա, և նույնիսկ ոչնչացում, որն էլ բերել է կենսաբազմազանության ընդհանուր աղքատացման»,–Facebook սոցցանցի իր էջում գրել է նախարարը։
Նրա խոսքով` երկրի հարուստ կենսաբազմազանությունն անգնահատելի արժեք է, որի պահպանության համար միջոցներ չեն խնայում ինչպես պետությունը, այնպես էլ միջազգային գործընկերները։ Պետրոսյանը հիշեցնում է, որ Հայաստանի տարածքը Եվրոպայի կենսաբազմազանության վերականգնման կարևորագույն օղակ է։
«Դե, գնա, գնա». Կարմիր գրքում գրանցված սև արագիլին բնություն են վերադարձրել
Հայաստանը գտնվում է աշխարհի կենսաբազմազանության 200 թեժ կետերի առաջին քսանյակում. մեր երկրի 1կմ քառակուսու վրա կա 107 տեսակ։
Հենց Հայաստանում են ներկայացված Կովկասի ամբողջ ֆլորայի գրեթե կեսը, իսկ տասնյակ կենդանատեսակներ համարվում են Հայաստանի էնդեմիկներ։
Պետրոսյանը հորդորում է չվնասել շրջակա միջավայրի կենսաբազմազանությունը։
Հիշեցնենք, որ օրերս ԱԺ նախկին պատգամավոր Լյովա Խաչատրյանն իր ֆեյսբուքյան էջում հրապարակել էր Հայաստանի Կարմիր գրքում գրանցված գորշ արջի սպանված ձագի վերաբերյալ տեսանյութ։ Նախարարությունն ասել էր, որ կզբաղվի այդ խնդրով։
Կարմիր գրքում գրանցված բվեճն այլևս զվարճանքի առարկա չէ. նա կապրի Կենդանաբանական այգում
