ԵՐԵՎԱՆ, 27 օգոստոսի – Sputnik. ՀՀ արդարադատության նախարար Ռուստամ Բադասյանը կառավարության այսօրվա նիստում ներկայացրեց նախագծերի փաթեթ, որի ընդունումը կարանտին հայտարարելու հնարավորություն կտա` առանց արտակարգ դրության ռեժիմի կիրառման։ Նախագծերի փաթեթը մշակվել է առողջապահության նախարարության հետ համատեղ։
«Ինչպես բազմիցս քննարկել ենք, հնարավոր է մի իրավիճակ, երբ վարակի աճի տեմպերի նվազեցումը հնարավորություն տա համաճարակի դեմ պայքարելու առանց արտակարգ դրության իրավական ռեժիմի։Հենց այդ նկատառումներով էլ մշակել ենք այս նախագծերի փաթեթը և առաջարկում ենք կատարել փոփոխություններ և լրացումներ հիմնականում 2 `«ՀՀ բնակչության սանիտարահամաճարակային անվտանգության ապահովման մասին » և «Արտակարգ իրավիճակներում բնակչության պաշտպանության մասին» օրենքներում ։Համապատասխան նախագծերի փաթեթը ժամանակին ընդունվելու դեպքում ՀՀ–ում մինչև սեպտեմբերի 11–ը երկարաձգված արտակարգ դրությունն այլևս չի երկարաձգվի»,–ասաց Բադասյանը։
Ըստ առաջարկվող փոփոխությունների` Հայաստանում վարակիչ հիվանդությունների տարածման, բռնկման և արտակարգ իրավիճակի առաջացման դեպքում կարող է կարանտին սահմանվել առողջապահության ոլորտում լիազորված պետական մարմնի առաջարկությամբ, մարզպետի կամ Երևանի քաղաքապետի կողմից ՝ համապատասխան վարչատարածքներում։ Կարանտին կարող է սահմանել նաև կառավարությունը երկու և ավելի մարզերում, մաքսակետերում և այլ տեղամասերում։
Ներկայացված փաստաթղթերի հետ կապված որոշ դիտարկումներ հնչեցրեց ՀՀ մարդու իրավունքների պաշտպան Արման Թաթոյանը։ Նրա խոսքով ՝ մշակված օրինագծերում տեղական իշխանությունների և այլ կառույցների գործառույթների ու լիազորությունների հստակ տարանջատում չկա։ Կա նաև քաղաքացիների մեկուսացման և ինքնամեկուսացման նորմերի որոշակի անհամապատասխանություն: Թաթոյանը խոստացավ կառավարությանն ու ԱԺ–ին ուղարկել իր դիտարկումները։ Օմբուդսմենը նաև նշեց, որ օրինագծերը փոխանցվել են իր գրասենյակ կառավարության նիստից մեկ օր առաջ: Այս հանգամանքը զայրացրեց վարչապետ Նիկոլ Փաշինյանին։
Նա դիմեց իր աշխատակազմի ղեկավար Էդուարդ Աղաջանյանին. «Ես ուզում եմ հասկանալ՝ այս գործելակերպին ե՞րբ է վերջ դրվելու, երբ կառավարության նիստին հնչում է, որ երեկ երեկոյան է ուղարկվել կարծիքի, սա ինչքա՞ն է շարունակվելու»։
Աղաջանյանը պատասխանեց, որ շահագրգիռ մարմիններին ուղարկելու պարտականությունը հարցը զեկուցող արդարադատության նախարարությանն էր։
Բադասյանն էլ հավելեց, որ մինչև վերջին պահը հայտնի չէր, թե որ գերատեսչությունն է լինելու հարցի զեկուցողը։
Վարչապետն առաջարկեց հավանություն տալ օրինագծերին, սակայն մանրակրկիտ քննարկել բոլոր շահագրգիռ կառույցների հետ։
Հիշեցնենք` մարտի 16–ից Հայաստանում արտակարգ դրություն է, որն արդեն մի քանի անգամ երկարաձգվել է։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Մայիսի 18–ից Հայաստանում աշխատում է նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով ու ձեռնոցով լինեն։
Հանրային բաց տարածքներում դիմակ դնելը նույնպես պարտադիր է։ Դիմակ կարող են չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները (վերջինները պետք է իրենց մոտ ունենան համապատասխան հիվանդության փաստը հաստատող բժշկական փաստաթուղթ)։
Օգոստոսի 12-ին ՀՀ կառավարությունը որոշեց արտակարգ դրության ռեժիմը երկարացնել մինչև սեպտեմբերի 11-ը: Օգոստոսի 13-ից կարելի է դիմակ չդնել նաև անձնական մեքենաներում և բնության գրկում։
