Ոստիկանությունը տեղեկացնում է, որ կալանավորել են «օրենքով գող» Անդրանիկ Սողոյանին` «Զապին»։
«Պարզվել է, որ մի քաղաքացի մեկ այլ քաղաքացուց հուլիսին հափշտակել է մոտ 4 միլիոն դրամ արժողությամբ ապրանք։ Դրանից հետո «քրեական հեղինակություն» հանդիսացող անձի կողմից ղեկավարվող քրեական ենթամշակույթ կրող խմբավորման անդամը թանկարժեք ապրանքը հափշտակած անձին տարել է իր մոտ և հափշտակված ապրանքի վերադարձման հարցի շուրջ պարզաբանումներ սկսել նրա հետ»,–նշված է ոստիկանության հաղորդագրության մեջ։
Դրա մասին տեղեկացել է «Զապը», որն էլ մեկ այլ անձի միջոցով իր անունից հրահանգել է «քրեական հեղինակություն» հանդիսացող անձին դադարեցնել պարզաբանումները։ «Զապը» խոստացել է վերը նշված խնդիրը լուծել:
«Քրեական հեղինակությունը» հրահանգել է իր ղեկավարած խմբավորման անդամին՝ հափշտակություն կատարած անձին բերել իր մոտ, որից հետո վերջինիս բաց է թողել։ «Քրեական հեղինակությունն» այդ մասին տեղյակ է պահել «Զապին»։
Դեպքի առթիվ հարուցվել է քրեական գործ, որն ուղարկվել է Քննչական կոմիտե։ 52-ամյա Անդրանիկ Սողոյանը կալանավորված է։
Հիշեցնենք` այսօր ԱԱԾ–ն հայտնել էր, որ ձերբակալվել է «օրենքով գողի» կարգավիճակ ստացած, «Օշականցի Գևորիկ» մականունով Գ. Մ.-ն։
