ԵՐԵՎԱՆ, 24 օգոստոսի – Sputnik. ՀՀ կրթության, գիտության, մշակույթի և սպորտի նախարարության դիմաց Արայիկ Հարությունյանի հրաժարականը պահանջողներից երեքին բերման ենթարկեցին։
«Նրանք բերման են ենթարկվել Վարչական իրավախախտումների վերաբերյալ օրենսգրքի 182-րդ հոդվածի համաձայն»,– Sputnik Արմենիային հայտնեցին ՀՀ ոստիկանության մամուլի ծառայությունից։
Տվյալ հոդվածը վերաբերում է հասարակական կարգի պահպանության, հասարակական անվտանգության ապահովման, օբյեկտների պահպանության պարտականությունները կատարելու ընթացքում ոստիկանության զորքերի զինծառայողի կամ ոստիկանության ծառայողի օրինական պահանջը չկատարելուն։ Այս պահանջը խախտելու համար 50 հազար տուգանք է նախատեսվում։
Հիշեցնենք` «Կամք» հասարակական նախաձեռնությունն արդեն մի քանի ժամ է` բողոքի ակցիա է անցկացնում Երևանում` պահանջելով ՀՀ կրթության, գիտության, մշակույթի և սպորտի նախարար Արայիկ Հարությունյանի հրաժարականը։ Ակցիայի մասնակիցները հավաքվել են նախարարության շենքի դիմաց և վանկարկում են. «Արայիկ հեռացիր»:
Մինչ նախարարության շենքի մոտ հավաքվելը բողոքի ակցիայի մասնակիցները ավտոերթ անցկացրին Երևանում, նրանք մեքենաներից մեկի թափքում աղբաման էին դրել, որի մեջ տեղադրել էին նախարարի նկարը։
